Toshkent Botanika bog‘ida Xotira va Qadrlash kuniga bag‘ishlangan bayram tadbiri bo‘lib o‘tdi. Unda Shavkat Mirziyoyev ishtirok etdi. Bu haqda Prezident matbuot xizmati ma’lum qildi.

Foto: Prezident matbuot xizmati

Davlat rahbari bayram tadbiriga kelgan urush va mehnat faxriylarining har biri bilan alohida salomlashib, hol-ahvol so‘radi. Ularga sihat-salomatlik, uzoq umr tiladi. Nuroniylar yurtga tinchlik-osoyishtalik, xalqimizga farovonlik tilab duolar qildi.

Foto: Prezident matbuot xizmati

Bog‘da Ikkinchi jahon urushi vaqtidagi kompozitsiyalar installyatsiyasi aks ettirilgan. Poyezd va harbiy texnikalar namoyish qilingan.

Foto: Prezident matbuot xizmati

Ramziy sahnada mashhur o‘zbek generali Sobir Rahimov qo‘mondonligidagi diviziyaning qahramonligi aks ettirildi. Prezident faxriylar bilan birga uni tomosha qildi.

Foto: Prezident matbuot xizmati

Insoniyat tarixidagi eng dahshatli bu urushda O‘zbekistondan 1,5 milliondan ortiq odam qatnashgan. Butun xalq tinimsiz mehnat qilib, jang maydonlariga harbiy texnika va qurol-yaroq, kiyim-kechak, oziq-ovqat yetkazib turgan. Urush hududlaridan ko‘chirib keltirilgan 1 millionga yaqin insonga boshpana berib, o‘z rizqini baham ko‘rgan.

Bayram tadbirida mamlakatning barcha hududlaridan kelgan urush va mehnat faxriylari ishtirok etdi.

Foto: Prezident matbuot xizmati

Shavkat Mirziyoyev Xotira va Qadrlash kuni hamda G‘alabaning 74 yilligi bilan barcha faxriylarni, butun xalqimizni tabrikladi.

Foto: Prezident matbuot xizmati

Keksalarga, mo‘’tabar faxriylarga yuksak e’tibor va g‘amxo‘rlik ko‘rsatish davlatimiz siyosatining ustuvor yo‘nalishi ekani ta’kidlandi.

Foto: Prezident matbuot xizmati

Bayram tadbirida Qurolli Kuchlar Markaziy ashula va raqs ansambli, folklor jamoalar, estrada xonandalari ijrosida kuy-qo‘shiqlar yangradi.

Foto: Prezident matbuot xizmati

Bunday tadbirlar mamlakatning barcha hududlarida bo‘lib o‘tmoqda.

Foto: Prezident matbuot xizmati