Bosh prokuratura: Toshkent shahar klinik psixiatriya shifoxonasi xodimi bemorga jarohat yetkazgani yuzasidan jinoyat ishi qo‘zg‘atish rad qilindi

2019-yil 25-aprelda “102”ga qarindoshi bo‘lgan fuqaro R.A.dan murojaat tushgan. U o‘z murojaatida tibbiy xodim qarindoshiga tan jarohati yetkazganini ma’lum qilgan edi. Ushbu holat yuzasidan Bosh prokuratura ma’lumot berdi.

Mazkur murojaat Mirobod tumani IIO FMB 3-sonli IIB tomonidan 25-aprel kuni qayd etilib, ijro uchun IIB profilaktika inspektori A.R.Turdiboyevga topshirilgan.

A.R.Turdiboyev tomonidan tergovga qadar tekshiruv harakatlari olib borilgan. R.A. bo‘lib o‘tgan holat yuzasidan hech kimga hech qanday da’vosi yo‘qligini bildirgan. Shu sababli Jinoyat Kodeksining 83-moddasi 2-bandiga asosan jinoyat ishi qo‘zg‘atishni rad qilish haqida qaror qabul qilingan.

Ushbu qaror 1-may kuni Mirobod tuman prokuraturasi tomonidan bekor qilinib, qo‘shimcha tekshiruv harakatlari olib borilmoqda.