Ijtimoiy tarmoqlarda Cobalt avtomobili “O‘zbekiston temir yo‘llari” poyezdi harakatlanayotgan yo‘lni kesib o‘tgani aks etgan video tarqalgan edi. Poyezd harakatidan oldin avtomobil yo‘li berkilganini ko‘rgan haydovchi shlagbaum yonidan aylanib, poyezd yo‘lini kesib o‘tgan. Videoda signal chalib kelayotgan poyezd bir soniyadan keyin o‘sha yo‘ldan o‘tganini ko‘rish mumkin.
Farg‘ona viloyati IIB yo‘l harakati xavfsizligi boshqarmasi ma’lumotiga ko‘ra, voqea 2019-yilning 16-aprel kuni Qo‘qon shahrida sodir bo‘lgan. Qayd etilishicha, Qo‘qon–Qaqir temir yo‘l bekatlari oralig‘ida joylashgan qo‘riqlanadigan temir yo‘l kesishmasida Cobalt va Nexia avtomobillari shlagbaum yonidan aylanib, katta tezlikda kelayotgan poyezd yo‘lini kesib o‘tgan.
Mazkur holat bo‘yicha olib borilgan surishtiruvlar natijasida aniqlanishicha, Cobalt avtomobili temir yo‘l kesishmasida harakatlangan vaqtda uni O‘zbekiston tumani Qizilbog‘ qishlog‘ida yashovchi M.B. boshqargan. Nexia avtomobili esa O‘zbekiston tumani Qizilbog‘ qishlog‘ida yashovchi M.M. boshqaruvida bo‘lgan.
Haydovchilarga yo‘l harakati qoidalarining 118-bandi va Ma’muriy javobgarlik to‘g‘risidagi kodeksning 130-moddasiga asosan ma’muriy bayonnoma rasmiylashtirildi.
“Daryo” manbasining ma’lum qilishicha, Cobalt avtomobili salonida bemor ayol bo‘lgan. Haydovchi uni zudlik bilan shifoxonaga yetkazish niyatida o‘zi va yo‘lovchilari hayotini xavf ostiga qo‘yib, bu tavakkalchilikka qo‘l urgan.
Izoh (0)