Andijonda qilmishidan pushaymon bo‘lgan terrorchiga ozodlikni cheklash jazosi tayinlandi
Andijon viloyatining Xo‘jaobod pedagogika va ijtimoiy-iqtisodiyot kollejida o‘tkazilgan ochiq sayyor sud majlisida adashib diniy ekstremistik oqimga kirib qolgan, bir necha yillar davomida chet ellarda yurib, chin dildan pushaymon bo‘lib O‘zbekistonga qaytgan shaxsga sud tomonidan jazo tayinlandi. Bu haqda viloyat sudi sudya katta yordamchisi Komronshoh Rasulov xabar bermoqda.
Jinoyat ishlari bo‘yicha viloyat sudi sudyasi Ilhomjon Sotvoldiyevning ma’lum qilishicha, sayyor sud majlisida fuqaro Xayrullo Hamdamovga nisbatan jinoyat ishi xalq maslahatchilari, guvohlar va Guliston mahallasida yashovchi aholi vakillari ishtirokida ko‘rib chiqilgan.
Jinoyat ishi hujjatlarini o‘rganish davomida sudlanuvchi Hamdamov bir guruh shaxslar bilan jinoiy til biriktirib, guruh bo‘lib, 1996–2006-yillar mobaynida Xo‘jaobod tuman hududida hamda 2006–2010-yillar mobaynida Rossiyaning Kaliningrad shahrida shu ish bo‘yicha ilgari sudlangan boshqa shaxs tomonidan tashkil etilgan “Islomchi jihodchilar” diniy ekstremistik oqimi jamoatiga qo‘shilgan. Aynan shu yerda boshqa shaxsning jamoat rahbarligi ostida tashkil etilgan diniy darslarda muntazam ravishda ishtirok etib, unda diniy ekstremizm, separatizm va aqidaparastlik g‘oyalari bilan yo‘g‘rilgan o‘zining mazmuniga ko‘ra qirg‘in solishga, fuqarolarni zo‘rlik bilan ko‘chirib yuborishga, aholi orasida vahima chiqarishga da’vat etadigan “O‘zbekiston Islom harakati”ning “Jundulloh” studiyasi tomonidan tayyorlangan “Murojaat” nomli videoroligi hamda boshqa shunday g‘oyalar bilan yo‘g‘rilgan ma’lumotlar bilan tanishib, ularni ko‘rib, jamoat rahbari ko‘rsatmasi bilan tuzilgan “baytulmol” jamg‘armasiga muntazam ravishda pul topshirib kelgan.
Bundan tashqari, Xayrullo Hamdamov 2000-yil mart oyida fuqarolar totuvligini buzish, tuhmatona, vaziyatni beqarorlashtiruvchi uydirmalar tarqatish hamda jamiyatda qaror topgan xulq-atvor qoidalariga va jamoat xavfsizligiga qarshi qaratilgan boshqa qilmishlarni sodir etishda dindan foydalanishni ko‘zlab faoliyat yuritgan “Islomchi jihodchilar” diniy ekstremistik oqimning jamoat rahbari bo‘lgan. Shuningdek, “Mujohidlar qo‘llanmasi” nomli daftar shaklidagi qo‘llanma va boshqa shunday g‘oyalar bilan yo‘g‘rilgan ma’lumotlarni tarqatish maqsadida o‘zida saqlab, ularni bir necha shaxslarga tarqatgan.
Bundan tashqari, Rossiyaning Kaliningrad shahrida yashab kelishi davomida 2014-yilda dastlabki tergov va sudda shaxsini aniqlash imkoni bo‘lmagan “Vasiliy, “Sergey” va “Aleksandr” ismli shaxslar bilan oldindan jinoiy til biriktirgan. Ularning yordamida Xo‘jaobod tumani IIB tomonidan 1999-yil 25-oktabrda berilgan CL № 1117785 seriya raqamli fuqarolik pasportiga dunyoning barcha davlatlariga chiqish uchun beriladigan ruxsatnoma yozuvi “stiker”ni rasmiylashtirmasdan 2014-yilning may oyi o‘rtalarida Rossiyadan Polsha orqali Germaniyaga qonunga xilof ravishda o‘tgan.
Sudlanuvchi Hamdamov sudda, aybiga qisman iqrorligi va qilmishidan pushaymonligini bildirib, 1996-yildan 2000-yilga qadar S.Soqiyev, B.Qodirov, A.G‘ulomov, B.Xo‘jamberdiyev va K.Komilov kabi shaxslar bilan birga Yu.Aripovdan diniy saboq olganini bildirib, ular yig‘ilgan vaqtlarda Afg‘oniston jangarilar lagerida bo‘lgan shaxslar haqida suhbatlar borganini aytgan.
Sud hukmiga ko‘ra, Xayrullo Hamdamov Jinoyat kodeksining 244-1-moddasi (Jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismining “a” bandi, 244-2-moddasining (Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) 1-qismi, 223-moddasi (Qonunga xilof ravishda chet elga chiqish yoki O‘zbekiston Respublikasiga kirish) 2-qismining “b” bandi bilan aybli deb topilib, jazolarni qisman qo‘shish yo‘li bilan o‘tash uchun uzil-kesil 5 yil ozodlikni cheklash jazosi tayinlandi. Jazoni o‘tash davrida kechki soat 21:00 dan ertalabki soat 06:00 ga qadar yashash uyini tark etish, ommaviy va boshqa tadbirlar o‘tkazishda ishtirok etmaslik, roziliksiz yashash joyini o‘zgartirmaslik, internetdan foydalanish taqiqlandi.
