O‘zbekiston Xotin-qizlar qo‘mitasi Markaziy saylov komissiyasi bilan o‘zaro hamkorlik bitimini imzoladi

Mamlakat tarixida ilk bora imzolangan Mazkur kelishuv xotin-qizlarning mamlakatda o‘tkaziladigan saylovlarda ishtirok etishda konstitutsion huquqlaridan foydalanishni ta’minlash maqsadida o‘zaro hamkorlik takomillashtirilishini ko‘zda tutadi.

Shu nuqtai nazardan, xotin-qizlar safidan deputatlar sonini ko‘paytirish, nomzodlarni saylov qonunchiligidan xabardorligi va huquqiy savodxonligi darajasini oshirish, xotin-qizlarning siyosiy faolligini ta’minlash bilan bog‘liq muammolarni o‘rganish hamda ularning saylov huquqlarini kengaytirishga qaratilgan tavsiyalarni ishlab chiqadi va amalga oshiradi.

Hamkorlik doirasida saylovlar jarayonida ayollarning ijtimoiy faolligini oshirish, saylov sohasidagi bilimlarini boyitish, saylovoldi va saylov jarayonlariga xotin-qizlarning keng jalb qilinishiga qaratilgan huquqiy o‘quvlar, uchrashuvlar va davra suhbatlari o‘tkaziladi.

Mazkur kelishuv O‘zbekistonda xotin-qizlarning salohiyatini yanada rivojlantirish, yetakchilik qobiliyatini kuchaytirish, siyosatchi, rahbar va jamoat arboblari sifatida o‘zlarini namoyon qilish hamda mamlakatda olib borilayotgan ijtimoiy-siyosiy, iqtisodiy, axborot va mafkuraviy islohotlar jarayonida ularning ishtirokini kengaytirish va aholi farovonligini ta’minlashda o‘z samarasini beradi.