14-aprel, yakshanba kuni futbol bo‘yicha Angliya premyer ligasi 34-turining markaziy bahsida “Liverpul” klubi o‘z maydonida “Chelsi”ni mag‘lubiyatga uchratdi (2:0).

Foto: Reuters

Mersisaydliklar “Chelsi” bilan kechgan so‘nggi 5 ta o‘yindan iborat muvaffaqiyatsiz seriyasiga nuqta qo‘ydi (2 ta mag‘lubiyat va 3 ta durang). “Qizillar” London klubini 2016-yilning sentabr oyidan buyon yutolmay kelayotgandi. O‘shanda mersisaydliklar mehmonda “Chelsi” ustidan 2:1 hisobida zafar quchgandi.

Shu bilan birga “Liverpul” jamoasi “Enfild”da bo‘lib o‘tgan “Chelsi”ga qarshi 8 ta uchrashuvda g‘alaba qozonolmay kelayotgandi — 3 ta mag‘lubiyat va 5 ta durang. “Liverpul” uy uchrashuvida oxirgi marta 2012-yilning may oyida “Chelsi” ustidan g‘alabaga erishgandi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!