Toshkentda 11-apreldan patrul vertolyoti poytaxt yo‘llarida Yo‘l harakati qoidalariga rioya etilishini kuzatib borishi e’lon qilingan edi. Biroq, “Daryo” muxbirining ma’lum qilishicha, vertolyot parvozi ob-havo noqulayligi sababli noma’lum muddatga qoldirilgan.
Toshkent shahar IIBB boshlig‘i o‘rinbosari Azizxon Umarovning so‘zlariga ko‘ra, poytaxt militsiyasi patrul uchun Mudofaa vazirligining vertolyotidan foydalanmoqchi bo‘lgan. Qayd etishlaricha, Ichki ishlar vazirligi kelgusida videokuzatuv ishlarini amalga oshirish uchun mo‘ljallangan ikkita maxsus vertolyot sotib olishni rejalashtirmoqda.
13-aprel kuni Toshkent shahar IIBBda bo‘lib o‘tgan brifingda ma’lum qilinishicha, IIVdan tashqari Sog‘liqni saqlash vazirligiga ham vertolyot berilishi mumkin. Vertolyotlarni aynan qaysi tashkilot sotib olishi va bu ishlar qay tartibda amalga oshirilishi haqida hozircha aniq ma’lumot yo‘q.
Ma’lumot uchun, Prezident Shavkat Mirziyoyev yanvar oyida Yunusobod tumanidagi 7-ichki ishlar bo‘limiga tashrifi chog‘ida Toshkent shahar IIBBga zamonaviy vertolyotlar ajratish bo‘yicha topshiriq bergan edi. Bundan tashqari, Prezident hukumatga 2020-yilga qadar sanitar aviatsiyasi uchun havo kemalari yoki aviatsiya xizmatlarini sotib olish bo‘yicha taklif tayyorlash haqida ham ko‘rsatma bergan.
Izoh (0)