Kitobxon o‘quvchi O‘zbekiston shaharlaridan biriga bir haftalik sayohatga boradi

Joriy yilning 29-mayiga qadar O‘zbekistondagi barcha umumta’lim maktablari o‘quvchilari o‘rtasida eng ko‘p kitob o‘qigan o‘quvchi tanlovi o‘tkaziladi, bu haqda O‘zA xabar beradi.

Respublika Ma’naviyat va ma’rifat markazi tomonidan o‘tkazilishi rejalashtirilayotgan tanlov g‘olibiga respublikaning tarixiy shaharlaridan biriga yozgi ta’til vaqtida bir haftalik sayohat yo‘llanmasi beriladi.

Bu haqda Respublika Ma’naviyat va ma’rifat markazi rahbari A.Qodirov Toshkent viloyati Bo‘ka tumanidagi 3- va 5-umumta’lim maktabi o‘quvchilari bilan uchrashuvida ma’lum qildi.

Respublika Ma’naviyat va ma’rifat markazi Bo‘ka tumanida qator tadbirlar o‘tkazmoqda. Ana shunday tadbirlarda markaz tomonidan aholi va yoshlarga 2 mingdan ziyod kitoblar taqdim etildi.

Ma’lumotlarga ko‘ra, tumandagi qarovsiz eski stadion o‘rnida tuman Ma’naviyat va ma’rifat ekoparki qurilishi mo‘ljallanmoqda.