“Kulrang ro‘yxat”dagi telefonlar hozircha bloklanmaydigan bo‘ldi

ATK vaziriligi IMEI kodlari GSMA’ga mos kelmaydigan telefonlar ishini cheklamaslikka qaror qildi, deb xabar berdi Spot.

Bu haqda ATK vazirligining Telekommunikatsiya tarmoqlarini istiqbolli rivojlantirish boshqarmasi boshlig‘i Timur Mashanpin “O‘zbekiston 24” kanaliga bergan intervyuda ma’lum qilgan.

Faqat o‘g‘irlangani yoki yo‘qolgani sababli “qora ro‘yxat”ga tushgan telefonlargina bloklanadi. Mashanpin, agar telefon o‘g‘irlangan yoki yo‘qolgan bo‘lsa, uning egasi Ichki ishlar boshqarmasiga murojaat qilib, aloqa operatoriga ham xabar berish kerakligini aytgan. IIB so‘rovnomani ATK vazirligiga yuboradi va ular qurilmani “qora ro‘yxat”ga kiritadi.

Mashanpinning so‘zlariga ko‘ra, avtomatik ro‘yxatdan o‘tish tugagandan so‘ng (qachonligi ma’lum qilinmagan) “kulrang” telefonlardan foydalanish ham cheklanadi.

Eslatib o‘tamiz, 1-apreldan O‘zbekistonda mobil qurilmalarni IMEI bo‘yicha ro‘yxatga olish boshlandi.