Avval xabar berganimizdek, Shavkat Mirziyoyev Termizda o‘z ishini boshlagan Xalqaro baxshichilik san’ati festivalining tantanali ochilishi marosimida ishtirok etdi.
Anjuman o‘tkaziladigan maydon atrofi bayramona bezatilgan. Baxshichilik san’atiga oid ko‘rgazmalar, milliy soz va liboslar, o‘tov va so‘zanalar, tasviriy va amaliy san’at asarlari, kitoblar, albomlar namoyishi tashkil etilgan.
Prezident ochilish marosimidan so‘ng ushbu ko‘rgazmalar bilan tanishdi.
Qoraqalpog‘iston va barcha viloyatlardan kelgan folklor jamoalarning chiqishlarini tomosha qildi, xalq hunarmandchiligi mahsulotlarini ko‘zdan kechirdi.
Ijodkor va hunarmandlar bilan suhbatlashib, kelgusi ishlariga muvaffaqiyat tiladi.
Xalqaro baxshichilik san’ati festivali ikki yilda bir marta o‘tkaziladi, dostonchilik san’atini asrab-avaylash va keng targ‘ib qilish, turli xalqlar o‘rtasida do‘stlik va ijodiy hamkorlikni mustahkamlashga xizmat qiladi.
Bu yil birinchi marta o‘tkazilayotgan festivalda 74 mamlakatdan 160 nafardan ortiq vakil qatnashmoqda.
Izoh (0)