“Bravo”ning litsenziyasi tugatilishida Kabulovning qo‘li bormi? “Million”ning rahbari shu savolga javob berdi (video)

“Million” jamoasining sardori Davron Kabulov “Daryo” internet-nashri uchun eksklyuziv intervyu berdi. Intervyuni jurnalist Feruz Muhammad uyushtirdi.

Davron Kabulov suhbat davomida “‘Bravo’ning litsenziyasini tugatilishida Davron Kabulovning qo‘li bormi?”, deya izoh qoldirayotganlar haqida gapirib, ushbu masalaga oydinlik kiritdi.

Yaqinda bir joyda “‘Bravo’ning litsenziyasi olib qo‘yilishida Davron Kabulovning qo‘li bor” degan narsani o‘qib qoldim. “Qo‘lini qayerga cho‘zsa, o‘sha yerga yetadi”, deb o‘ylashadimi meni?! Avvalom kimgadir yomonlik qilish fikridan asrasin. Agarda kimgadir yomonlik qilish niyatim bo‘lganda, jamoaning tark etgan har bir a’zosi bilan shartnomamiz bor edi — yuristlar orqali kurashardik.

Mening yomonlik qilish niyatim yo‘q, qonuniy huquqni talab qilgan taqdirimda ham odamlarning “O‘zi bilan birga ko‘tarilgan bolalarning orqasidan ish qilib yuribdi”, degan gapi kerak emas. Odam bitta ulovda siz bilan yo‘lga chiqdimi, ertaga siz bilan tushib qolganidan hozir tushib qolgani ma’qul. Oxirgi manzilgacha siz ishonchli odamlar bilan borsangiz yaxshi.

Davron Kabulov, “Million” jamoasining sardori