Angliya premyer ligasi nafaqat tomoshabopligi bilan, balki o‘zining tinim-bilmas jangchi-futbolchilari bilan ham muxlislarni doimo o‘ziga qaratib keladi. Quyida maydondagi eng quvnoq pozitsiyalardan biri bo‘lgan — hujum chizig‘ida qachonlardir to‘p surgan va ayni damda ham faoliyatini davom ettirayotgan chet ellik eng yaxshi hujumchilar haqida so‘z yuritiladi.

Foto: Getty Images

  1. Didye Drogba

Ro‘yxatning beshinchi o‘rnidan ingliz futboli tarixida o‘chmas iz qoldirgan “Chelsi” hujumchisi Didye Drogba o‘rin egallagan. Afrikalik futbolchi London klubiga ikki bor kelishiga to‘g‘ri kelgan. Ammo biz uning jamoaga bo‘lgan birinchi tashrifi haqida eslaymiz. Axir u Tumanli Albionga birinchi safari davomida 254 ta o‘yin o‘tkazib, 104 ta gol urgandi. Qayd etish joiz, Drogba o‘z vaqtida ko‘plab o‘yinlarni 1:0, 2:0 kabi hisoblarda yutadigan Joze Mourinyo qo‘l ostida to‘p surgan. Biroq hech bir jihat uning APLda 54 ta golli uzatmani ham amalga oshirishiga halal bera olmagan. Drogbaning bosh bilan o‘ynashiga esa shunchaki gap yo‘q edi. U bu qobiliyati bilan 17 ta gol urgandi. Uning yordamida “Chelsi” Angliyada 4 bor chempion degan nomga musharraf bo‘ldi. Drogba esa 2 bor “Oltin butsa” sovrinini ham qo‘lga kiritdi. Didye London klubi muxlislari yodida nafaqat o‘zining o‘yinlar va gollari, shuningdek, o‘ziga xos metin xarakteri va jamoadoshlarini ruhlantira olishi bilan ham qoladigan bo‘ldi.

  1. Dennis Bergkmap

Foto: GiveMeSport

Ko‘pchilikning fikriga ko‘ra, Dennis ingliz futbolida revolutsiya qila olgan futbolchilardan bir edi. Britaniyaliklar qattiqqo‘l va konservativligi bilan ajralib turgan. Ammo hammasi “uchmas holland” ingliz diyoriga tashrif buyurishi bilan o‘zgarib ketdi. U hujumchidan ham ko‘proq pleymeykerga o‘xshardi. U “to‘pchilar” safida 315 ta o‘yinda 87 ta gol urdi. Bergkamp 4 bora Angliyada oyning eng yaxshi futbolchisi deb topildi. Aynan u bilan “Arsenal” ingliz futboli tarixidagi eng yaxshi o‘yinlarini namoyish etdi. Niderlandiyalik sabab Arsen Venger jamoasi Angliyada 3 bor chempionlikka ega chiqdi. U bunga nafaqat gollari, balki o‘zining zargarona paslari orqali amalga oshirilgan 94 ta golli uzatmasi bilan ham hissa qo‘shgani bilan yodda qoldi. Dennisning uzatmalari o‘zgacha trayektoriyaga ega bo‘lganligi haqida jamoadoshlari ham ko‘p bora ta’kidlab o‘tgan. O‘zining takrorlanmas harakatlari bilan ham Dennis ushbu ro‘yxatga kirishga 100 foiz haqli.

  1. Erik Kantona

Foto: The Sportsman

“Manchester Yunayted”ning mamlakatda yetakchi jamoa roliga chiqishida “Qirol Erik”ning xizmatlari beqiyos. Bergkamp “Arsenal”ni qanday o‘zgartirgan bo‘lsa, xuddi shunday ishni “Manchester”da Kantona amalga oshirdi. Uning takrolanmas o‘yin uslubi va shaxsi jamoadoshlarini g‘alaba yo‘lida ruhlantira olgan. Uning jamoa kelib qo‘shilishi bilan hamma narsa, hattoki mashg‘ulotlar ham o‘zgaradi. Fransuz o‘zi ishlagan jarimalarni o‘zi amalga oshirardi. Uning ishga bo‘lgan munosabati esa aka-uka Nevillar va Rayan Giggzga kattagina ta’sir ko‘rsatdi. Ser Aleks Fergyuson “Lids” yulduzini sotib olib, ingliz futboli uchun rekord qo‘ygandi (1992-yil, 1,2 mln funt evaziga). Shu bilan birga shotlandiyalik mutaxassis katta tavakkalga ham qo‘l urgandi. Muxlisga qilgan hujumi bois 10 oylik diskvalifikatsiyani o‘tagan Kantona xarididan keyinchalik hech kim afsuslanmagani bor gap. Erik “Yunayted” safida 156 ta o‘yinda 70 ta gol urib qo‘ydi. Bundan tashqari 56 ta golli uzatma ham tort ustiga olcha misoli yarashib turardi. “Yunayted” Kantona bilan 5 mavsum ichida 4 karra mamlakat chempionligini qo‘lga kiritdi. Va haqli tarzda ushbu ro‘yxatdan o‘rin oldi.

  1. Serxio Aguero

Foto: Twitter

Ushbu ro‘yxatdagi boshqa o‘yinchilar kabi Serxio Aguero ham o‘z jamoasi — “Manchester Siti”ni yetarlicha kuchaytira oldi. Aguero nafaqat individual jihatdan kuchli, balki Kantona singari jamoadoshlarini ruhlantira olish qobiliyatiga ham egaligi bilan ajralib turardi. U jamoaning yangi darajaga chiqishida katta xizmat qilib kelmoqda. Hozir esa hech bir mubolag‘asiz Agueroni liga tarixidagi eng yaxshi Janubiy amerikalik deb atasa bo‘ladi. Xavfli hujumchi, aqlli yetakchi va iqtidorli “yakunlovchi” — bularning barchasi Agueroga berilgan ta’riflar. Serxio “Siti”da istalgan murabbiy bilan tez til topishib keta oldi. Hozir ham Pep Gvardiola qo‘l ostida ajoyib o‘yin va sermahsullik namoyish etmoqda. Statistika esa so‘zlarimizga yaqqol isbot: 232 ta o‘yin, 161 ta gol. Aguero 2015-yilda “Oltin butsa”ni yutisha erishdi. Uch marta esa Angliya chempionligini qo‘lga kiritdi. Argentinalik nafaqat gollar urib, balki 41 ta golli uzatmasi bilan ham sheriklariga katta yordam berishda davom etmoqda. “Manchester Siti” tarixidagi eng muhim gollardan birini (agar eng muhimi bo‘lmasa) ham Serxio Aguero urgandi. U 2011/12-yilgi mavsumning so‘nggi o‘yinining oxirgi daqiqalarida chempionlik golini urib, jamoa muxlislariga olam-olam zavq ulashgandi.

  1. Tyerri Anri

Foto: The Sun

Angliya premyer ligasi haqida gapirar ekanmiz, darhol Anri haqida o‘ylab qolamiz. Buyuk hujumchi, har qaysi qanotda o‘ynasa ham foydali edi. Anri — maydondagi haqiqiy san’at asari. Uni ko‘rganda, hatto futbolni unchalik tushunmaydigan inson ham ko‘z oldida buyuk atlet turganligini anglashi qiyin bo‘lmasdi. Tyerri nafaqat ajoyib texnika, balki sermahsulligi bilan ham musobaqa tarixidagi eng yaxshi legioner hujumchi nomiga munosibligini isbotlagan. 258 ta o‘yinda 175 ta gol. 2002 va 2004-yilda qo‘lga kiritilgan ikkita chempionlik unvoni, 4 ta “Oltin butsa” hamda 2 bor mavsumning eng yaxshi o‘yinchisi sovrinlari Anrining qay darajada o‘yin ko‘rsatganligiga yaqqol dalil. Fransuz gol urishdan tashqari yaxshigina assistant ham edi. Uning hisobida 74 ta golli uzatma ham borligi ham fakt. O‘z davrining eng yaxshi hujumchilaridan biri so‘zsiz “Arsenal” va ingliz futbolida munosib iz qoldira oldi.

Sportskeeda’dan Asror Abdunazarov tarjimasi

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!