Andijonlik sozgar Abdumalik Madraimov baxshilar do‘mbirasining yangi namunasini ishlab chiqdi (video)

Andijonlik sozgar, milliy sozlar ixtirochisi Abdumalik Madraimov baxshilar uchun do‘mbira sozining yangicha namunasini yaratdi. Bu haqda “Daryo” muxbiri xabar berdi.

“Shu yili 5—10-aprel kunlari Surxondaryo viloyatida o‘tadigan baxshilar xalqaro festevali uchun baxshilarimiz ovozi yaxshi, yangilangan do‘mbira yasab berishimizni so‘rab murojaat bilan chiqishdi. Yangi namunadagi cholg‘u ustida ikki oy ishladik. Ovozi baland, bemalol katta davralarda chalib aytishga qulay. Baxshilar bilan telefon orqali muloqot qilib, ovozini eshittirdik, ularga ma’qul keldi. Albatta, haqiqiy bahoni baxshilarimiz qo‘lida chalib ko‘rgandan so‘ng berishadi”, — deydi sozgar usta Abdumalik Madraimov.

Avvalgi yong‘oq daraxtidan o‘yib yasalgan do‘mbiradan farqli yangi namunadagi do‘mbira turli qismlardan yig‘ib ishlangan bo‘lib, ancha yengil. Qo‘l sirg‘anib chalishga qulay bo‘lishi uchun dastasi yedirilmaydigan va silliq tekistalitdan yasalgan. Shuningdek, musiqa maktablarining baxshichilik sinflari o‘quvchilariga moslangan varianti ham sinovdan o‘tkazilgan.

Abdumalik Madraimovning qo‘shimcha qilishicha, yangi namunadagi do‘mbirani yasashga bitta dutor yasashga ketgan vaqt va sarf-xarajatlar ishlatilgan. Bu hozirda 450 ming so‘m atrofiga to‘g‘ri keladi.

Usta ko‘p yillardan buyon O‘zbekistonda qo‘llanilayotgan 37 xildagi musiqa asboblarini qayta ishlash va takomillashtirish bilan shug‘ullunib keladi.