Tadbirkor davlat manfaatlariga 88 million so‘mlik moddiy zarar yetkazilganini yopish maqsadida MIB xodimiga pora taklif qildi. Bu haqda MIB “Daryo”ga ma’lum qildi.
Farg‘ona viloyati Yozyovon tumani Yangiobod qishlog‘ida joylashgan fermer xo‘jaligi ish yurituvchisi T.M. xo‘jalikka tegishli bo‘lgan 7,5 gektar yer maydonga ega baliq ko‘liga o‘zboshimchalik bilan noqonuniy ravishda elektr tarmog‘iga ulab foydalanib kelgan.
Mazkur holat yuzasidan Majburiy ijro byurosi Yozyovon tuman bo‘limi xodimlari tomonidan tegishli hujjatlar rasmiylashtirilib, qayta hisob‑kitob natijasida davlat manfaatlariga 88 million so‘mlik moddiy zarar yetkazilganligi aniqlangan.
Shundan so‘ng fuqaro T.M. aniqlangan moddiy zarar miqdorini kamaytirish hamda jinoiy javobgarlikdan qutulib qolish maqsadida Byuroning Yozyovon tuman bo‘limi xodimlari O.O‘rmonov va Sh.Mamajanovga 30 million so‘m miqdorda pora taklif qilib, shundan avans tariqasida 20 million so‘mini berishini ma’lum qilgan.
Byuroning viloyat boshqarmasi hamda tuman prokuraturasi xodimlari o‘zaro hamkorlikda o‘tkazilgan tezkor tadbir davomida fuqaro T.M. tuman markazidagi oshxonalardan birida MIB xodimiga 900 dollar va 500 ming so‘m miqdordagi pulni byuro xodimlariga pora tariqasida berayotgan vaqtida ashyoviy dalillar bilan jinoyat ustida ushlangan.
Yozyovon tuman prokuraturasi tomonidan T.M.ga nisbatan O‘zbekiston Respublikasi Jinoyat Kodeksining tegishli moddasi bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
Izoh (0)