Toshkentdagi “Yoshlar ijod saroyi”da “Uzbekistan fashion week – 2019” xalqaro moda haftaligining ochilish marosimi bo‘lib o‘tdi. Bu haqda “Daryo”ga Yoshlar media markazi ma’lum qildi.
Marosimda Birlashgan Arab Amirliklari, Iordaniya, Italiya, Fransiya, Rossiya, Qozog‘iston, Qirg‘iziston va Tojikistondan kelgan dizaynerlar, O‘zbekiston yoshlar ittifoqi qoshidagi “Yosh dizaynerlar kengashi” vakillari hamda OAV xodimlari ishtirok etdi.
Dizaynerlarning qizil yo‘lak bo‘ylab kolleksiyalaridagi eng sara liboslaridan kiygan modellar hamrohligida kirib kelishi mehmonlar qiziqishiga sabab bo‘ldi.
Xalqaro moda haftaligini “Yosh dizaynerlar kengashi” raisi Dilnoza Umrzoqova ochib berdi. Dastlabki “IKAT DAY” kunida ishtirokchilar milliylikka yo‘g‘rilgan liboslar to‘plamini namoyish etdi.
Zamonaviy va milliy uslub uyg‘unlashgan liboslar tashrif buyurganlar tomonidan iliq kutib olindi. Shuningdek, namoyish dizaynerlar o‘zaro tajriba almashishi uchun ham keng imkon yaratdi. Iroda A’zamxo‘ja, BAA vakili Mona Huseyn Muhammad Odeh, Madina Yo‘ldosheva, Shahzoda Muhammedova, Umed Kuchkaliyev, Kamilla Mi kabi dizaynerlar o‘z to‘plamlari bilan ishtirok etdi.
Kecha mehmonlari qatorida Aspara Fashion Week rahbari Aydarhan Kaliyev va “Tajikistan Fashion Week” rahbari Tohir Ibragimov bo‘ldi. Chet davlatlarida milliy matolarning mashhur ekani Yekaterina Aslamovaning “Sizning atlas va adraslar matolaringiz Rossiyada juda mashhur va unga talab yuqori” degan so‘zida yaqqol namoyon bo‘ldi.
Tadbirning ikkinchi kunida Metrics xalqaro moda akademiyasi asoschisi rossiyalik dizayner Yekaterina Aslamova tomonidan yosh dizaynerlar uchun mahorat darslari tashkil etildi. Mutaxassis dizayner bo‘lishni va o‘z brendini yaratishni xohlovchi yoshlarga bu borada nimalarga ahamiyat berish zarurligi haqida tushunchalar berdi.
Haftalik Haute couture, Pret-a-Porte ko‘rgazmalari va ASHI Studio nufuzli xalqaro brendining liboslar namoyishi bilan o‘zgacha tus olishi kutilmoqda.
— Mazkur haftalik orqali zardo‘zlik, kashtachilik yo‘nalishlaridagi o‘zbek moda brendlarini dunyoga tanitmoqchimiz, —deydi “Yosh dizaynerlar rengashi” raisi Dilnoza Umrzoqova. — Loyihada milliy liboslar, kundalik kiyimlar va xalqaro miqyosdagi maxsus liboslar ko‘rgazmasini namoyish etib, 4 nafar xalqaro moda haftaliklari prezidentlari bilan o‘zaro hamkorlik memorandumlari imzolashni rejalashtirganmiz.
“Uzbekistan fashion week - 2019” xalqaro moda ko‘rgazmalari Samarqand va Buxoro shaharlarida ham bo‘lib o‘tadi. 29-mart kuni xorijlik dizaynerlar Samarqand bo‘ylab sayohat qiladi, 30-mart kuni esa Buxorodagi “Buxoro Brilliant Silk” korxonasi faoliyati bilan tanishadi.
Izoh (0)