O‘zbekistonda Crescent Rating kompaniyasi bilan hamkorlikda mehmondo‘stlik reytingi joriy qilinadi. Bu haqda O‘zbekiston Respublikasi Turizmni rivojlantirish davlat qo‘mitasi xabar berdi.
Hozirda qo‘mita Crescent Rating kompaniyasi bilan turizm sohasida hamkorlik bitimini imzolash ishlarini olib bormoqda. Ushbu hamkorlik mehmonxonalar, restoranlar, shuningdek, transport xizmatlari va sayyohlik paketlarini taqdim etuvchi tadbirkorlar o‘rtasida musulmon mehmondo‘stligini baholashga yordam beradi. Bundan tashqari, hamkorlik turizm tashkilotlari va ziyorat turizmi gidlari uchun seminar-treninglarni ham tashkil qiladi.
Mamlakatga tashrif buyurgan mehmonlarga to‘liq ma’lumot berish uchun Turizmni rivojlantirish davlat qo‘mitasi “Ziyorat turizmi gidlari klubi”ni yaratmoqda. Klubning faoliyati gidlarning malakasini oshirishga, shuningdek, ularning ziyorat turizmga tayyorgarligiga qaratiladi.
Xalqaro izlanishlar shuni ko‘rsatadiki, ziyorat turizmi bo‘yicha sayohat qiladiganlar soni yildan yilga oshib bormoqda. Masalan, 2017-yilda musulmon sayyohlari 131 million kishini tashkil qilgan. Bunday turizmdan esa daromad 142 milliard dollarga yetgan.
Ko‘rinib turganidek, ziyorat turizmi dunyo turizm sanoatining eng tez rivojlanayotgan segmentlaridan biri hisoblanadi.
“2020-yilga kelib, musulmon sayyohlarning soni 160 millionga yetishi kutilmoqda. 2026-yilda esa bu turizm aylanmasi 300 milliard dollarni tashkil qiladi”, — deyiladi xabarda.
Dunyoning aksariyat mamlakatlari, shu jumladan, musulmon bo‘lmaganlari (Ispaniya, Yaponiya) ham mavjud istiqbollarni hisobga olgan holda ushbu sohaga faol investitsiya kiritmoqda.
Shu munosabat bilan O‘zbekiston iqtisodiyotni strategik sektorlardan biri sifatida turizm sanoatini rivojlantirish bo‘yicha kompleks chora-tadbirlarni izchil amalga oshirmoqda. Bu esa mintaqalarni jadal rivojlantirish, aholi daromadlari va turmush darajasini oshirish, shuningdek, investitsiya jalb qilishni yaxshilash imkonini beradi.
Izoh (0)