Teri qarishining oldini oluvchi mahsulotlar ma’lum bo‘ldi

AQShning Minnesota shtatidagi tibbiyot maktabi mutaxassislari ko‘p miqdorda qulupnay va olma iste’mol qilish inson terisini qarishdan himoya qilishi mumkin, degan xulosaga keldi. Bu haqda “Korrespondent.net” xabar berdi.

Ma’lum bo‘lishicha, olma va qulupnay tarkibidagi ko‘p miqdordagi flavonoid va fistein moddasi organizmdagi qariyotgan hujayralarni kamaytirishga sezilarli darajada yordam beradi. Boshqa mevalar tarkibida bu moddalar nisbatan kam miqdorda uchraydi.

Olimlar laboratoriya sharoitida sichqonlarda tajriba o‘tkazib, 10 ta flavonoidlarni sinagan. Ular orasida ko‘pchilik meva va sabzavotlar, shu jumladan olma va qulupnay hamda piyoz va bodring tarkibida uchraydigan fistein moddasi eng samarali deb topilgan.

Fistein sichqon hujayralarining qarishini sekinlashtirgan, bu esa ularning umr davomiyligini oshirgan.