Saturn yo‘ldoshi Titan odamzod ko‘chib o‘tishi uchun eng yaxshi joy deb topildi, deb yozadi Hi-tech.mail.ru.

Titan
Foto: NASA

NASA muhandisi Janel Uellonsning ishonch bildirishicha, agar Yer yashash uchun yaroqsiz holga kelsa, insoniyat Oyga yoki Marsga emas, balki Saturn yo‘ldoshidan biriga ko‘chib o‘tishi lozim. Uning aytishicha, Titan Quyosh tizimida ko‘chib o‘tish mumkin bo‘lgan eng yaxshi nomzod.

Janel Uellons bu fikrni Reddit internet portalida ma’lum qilgan bo‘lib, uni shaxsiy fikr sifatida emas, Aerokosmik agentlik vakili fikri sifatida bildirgan.

NASA muhandisining fikricha, Titanning afzalligi meteoritlar va kosmik radiatsiyadan himoya qiluvchi zich qatlamli atmosferaga egaligidir. Qolaversa atmosferaning shu darajada zichligidan, odamlar hatto taqiladigan qanotlar yordamida uchishlari mumkin.

Shu bilan birga, Titan suv havzalari bo‘lgan Quyosh tizimidagi (Yerdan tashqari) yagona sayyora. Havzalar, albatta suvdan emas, metandan iborat. Lekin shunga qaramay, ularda suzish mumkin.

Titanning asosiy kamchiligi uning Quyoshdan uzoqda joylashganligidir. Buning oqibatida sayyora yuzasidagi harorat -180 darajadan ko‘tarilmaydi.

Bunday sharoitda qanday qilib odamlari ko‘chirib o‘tkazish mumkinligi hozircha noma’lum. Lekin shunisi aniqki, odamlar bunday sovuqda qanotlarda uchishni xohlamaydi.