Vladimir Jirinovskiy o‘zini dunyodagi eng “ahmoqona” familiya egasi deb hisoblaydi

Vladimir Jirinovskiy o‘zining familiyasini “ahmoqona” deb atadi, deb “Vesti.ru” xabar bermoqda

Uning fikricha, tana qismlarining nomlaridan olingan barcha familiyalar “ahmoqonadir”. U Novosibirsk shahar hokimining familiyasi “Lokot” ya’ni “tirsak” deb atalishini misol tariqasida keltirib o‘tgan.

Jirinovskiyning familiyasi “yog‘” so‘zidan olingan. “Bunday “betayin” familiya dunyoda boshqa hech kimda yo‘q”, — dedi Rossiya Liberal demokratik partiyasi rahbari.

“RIA Novosti”ning xabar berishicha, Jirinovskiy avlodida Polovinkinlar, Gorbunovlar, Serguchyovlar, Makarovlar ham bo‘lgan. “Makarovni olishim kerak edi”, — deya qo‘shib qo‘ydi Jirinovskiy.

Jirinovskiy o‘zini shunday noyob familiya egasi deb hisoblasa-da, internetda qidiruv butunlay boshqacha natija ko‘rsatadi. Misol uchun, Jemal, Daniel va Elya Jirinovskiy ismli shaxslar Sankt-Peterburgda yashaydi. Boshqa Vladimir Jirinovskiy Donetskda yashaydi. Vladimir Volfovichning Adolf ismli familyadoshi ham bor.