Uchqo‘rg‘onda elektr energiyasini noqonuniy ulab, ustini bo‘yab qo‘ygan fuqaro aniqlandi

13-mart kuni Majburiy ijro byurosi Uchqo‘rg‘on tumani bo‘limi “Bo‘ston” mahallasida yashovchi U.Xayitov xonadonini ko‘zdan kechirganda yashirin tarmoqni aniqladi. Mazkur xonadon egasi elektr energiyasidan o‘g‘rincha foydalanish maqsadida devor ichidan tarmoq tortib, ustini hech kim bilmasligi uchun, bo‘yab qo‘ygani aniqlangan. Bu haqda “Daryo”ga Bosh prokuraturasi huzuridagi Majburiy ijro byurosi matbuot xizmati ma’lum qilgan.

Holat bo‘yicha U.Xayitov belgilangan tartibda tarmoqdan uzilib, tegishli dalolatnoma rasmiylashtirildi.

Ma’lum qilinishicha, tumanda 1-martga qadar elektr energiyasidan foydalanish qoidalarini buzgan 42 nafar iste’molchi aniqlangan. Ular ta’minotchi korxonalarga 146 900 000 million so‘m zarar yetkazgan. Barcha qoidabuzar iste’molchilarga nisbatan Ma’muriy javobgarlik kodeksining 101-moddasiga asosan ijro ishi qo‘zg‘atilib, yetkazilgan zarar summasi va jarimalar undirilmoqda.