Viloyat hokimining shu yil 15-mart kungi tadbirkorlar bilan uchrashuvida kattaqo‘rg‘onlik yakka tartibdagi tadbirkor Elyor Qodirov tuman markazidagi istirohat bog‘ida salqin ichimliklar va muzqaymoq savdosi bilan shug‘ullanib o‘nta doimiy ish o‘rni yaratgani, endi faoliyatini kengaytirib istirohat bog‘iga zamonaviy attraksionlar keltirishda amaliy yordam so‘rab murojaat qilgandi, deb xabar berdi “Zarnews”.
“Zamonaviy attraksionlar keltirib, bog‘ni yoshlarimizning ko‘ngilochar maskaniga aylantirish va Kadan qo‘rg‘onidagi qarovsiz holga kelib qolgan avtoturargohda yengil konstruksiyali bekat qurish bo‘yicha 2018 yil sentabr oyida tuman hokimiga taklifimni bildirib, amaliy yordam so‘ragandim. Ammo mart oyigacha ham natija bo‘lmadi. 9-mart kuni biznes loyihalarimni olib hokimga uchrashganim ham foydasiz bo‘ldi.
15-mart kuni viloyat hokimining qabulida bo‘lganimdan so‘ng kechga yaqin viloyat adliya boshqarmasi boshlig‘ining o‘rinbosari kelib joyimni va ishimni ko‘rib ketgach, birozdan so‘ng tuman hokimligiga chaqirishdi. Hokim xonasida tumandagi sohaga tegishli tashkilot rahbar-mutaxassislari, huquqni muhofaza qilish organlari vakillari va boshqa mansabdorlar mening murojaatimni hal etish o‘rniga tadbirkorlik faoliyatimdagi yo‘l qo‘ygan xatolarimni muhokama qilishdi. Hokimning ruxsati bilan uch metrli yo‘lakcha yotqizganim va istirohat bog‘idagi muzqaymoq kafesiga qo‘shni bo‘lgan notarius iltimosiga ko‘ra idora hovlisidagi gullarga suv quyib turishim uchun temir to‘siqdan eshik ochganim va o‘sha kuni bekitib qo‘yganim, ijara shartnomasidagi ishlarni bajarilmagan, deya qarorni bekor qilish va muzqaymoq kafesini buzdirib tashlash, o‘rnini auksionga qo‘yib sotishlarini bildirishdi.
Ichkaridan qanday chiqdim bilmadim, ammo eshik oldida hokimiyat xodimlari menga “Ko‘proq viloyat hokimidan yordam so‘rang, sizga bu ham kam, endi joyingizni buzamiz”, deb masxaralashdi.
“Aybim – viloyat hokimiga murojaat qilganimmi?”, deydi tadbirkor.
Izoh (0)