16-mart kuni Nyu-York shahrida Amerikaning eng qadimgi ilmiy muassasalaridan biri dunyoning yetakchi tadqiqotchilar, olimlar va kashfiyotchilarni birlashtirgan tadqiqotchilar klubining har yili o‘tkaziladigan 115-yig‘ilishi bo‘lib o‘tdi, deya xabar beradi “Daryo”ga Xotin-qizlar qo‘mitasi matbuot xizmati.
Unda O‘zbekiston Respublikasi Bosh vaziri o‘rinbosari, Xotin-qizlar qo‘mitasi raisi Tanzila Norboyeva boshchiligidagi mamlakat delegatsiyasi, shuningdek, Qo‘shma Shtatlardagi diplomatik vakolatxona rahbarlari ishtirok etdi.
Ushbu tadbir inson qadami Oyga yetganiga 50-yil to‘lganiga bag‘ishlangan bo‘lib, unda dunyoning turli burchaklaridan 2 mingga yaqin mehmonlar, jumladan, Kanada bosh vaziri, Portugaliyaning Turizm bo‘yicha davlat kotibi, “Apollon” missiyasining olti nafar astronavti, Xalqaro kosmik stansiyalarining kosmonavtlari, shuningdek, taniqli olimlar, tadqiqotchilar, yetakchi kompaniya rahbarlari hamda jahon shou-biznesining vakillari ishtirok etdi.
Tadbir dasturining asosiy marosimlaridan biri bu 2019-yilning yozida butun dunyodan 30 nafar yetakchi arxeologlardan iborat klubning O‘zbekistonga ekspeditsiyasini e’lon qilinishi bo‘ldi.
Bundan ko‘zlangan maqsad zamonaviy Qoraqalpog‘iston hududida kashf etilgan qadimiy Xorazmning poytaxtlaridan biri bo‘lgan “Bozor-qal’a” tarixiy majmuasini o‘rganishdir. Dastlabki hisob-kitoblarga ko‘ra, ushbu majmua eramizdan avvalgi VI-IV asrlarga taaluqli.
Tadqiqot davomida chet el olimlari o‘sha davrning madaniyati, mahalliy aholining madaniy xususiyatlarini, Ahamoniylar davlati bilan siyosiy aloqalar, shuningdek, ko‘chmanchi turmush tarzidan o‘troqqa o‘tish jarayonini o‘rganadi. 11-oktabr kuni Vashingtondagi O‘zbekiston elchixonasida bo‘lib o‘tadigan klub a’zolarining majlisida ekspeditsiya ishi to‘g‘risida hujjatli film taqdimoti o‘tkaziladi.
Amerika tomoning ma’lumotlariga ko‘ra, ekspeditsiyaning budjeti 750 ming dollarni tashkil etib, u yo‘naltirayotgan tomon hisobidan qoplanadi. Tadbirning bosh homiysi Yaponiyaning Infiniti ishlab chiqaruvchi kompaniyasidir. Ekspeditsiya ishida NASA’ning yuqori texnologiyalaridan foydalaniladi.
Tadqiqotchilar klubi rahbariyati bilan muzokaralar davomida AQShning yetakchi olim va tadqiqotchi ayollarining O‘zbekistonga tashrifi hamda “O‘zbekiston sehrli mamlakatiga Tadqiqotchilar klubi bilan borish uchun taklif” televizion loyihasi PBS telekanalida namoyish etilishi orqali bir yil davomida 114 million tomoshabinni qamrab olish masalalari muhokama etildi.
Izoh (0)