Rasman: Zinedin Zidan “Real”ga yana bosh murabbiy bo‘ldi

Madridning “Real” klubi argentinalik mutaxassis Santyago Solarini iste’foga chiqarib, klubning yangi bosh murabbiyi nomini e’lon qildi.

Unga ko‘ra, “Real”ni yana fransiyalik Zinedin Zidan boshqaradi. Bu haqda klub rasmiy saytida xabar berildi.

Zidan bilan Madrid klubi 2022-yil 30-iyuniga qadar mo‘ljallangan shartnoma imzolaydi.

Eslatib o‘tamiz, Zidan “Real” bilan Yevropa Chempionlar Ligasida ketma-ket uch marta g‘olib chiqqandan so‘ng xayrlashgandi.

Zidan 2016—2018-yillarda “Real”ni boshqardi. U Chempionlar Ligasidagi ketma-ket g‘olibliklardan tashqari, 2 bor UEFA Superkubogi va Klublar o‘rtasidagi Jahon chempionatida, shuningdek, 1 martadan Ispaniya Kubogi va Ispaniya La Ligasi g‘olibi bo‘ldi. “Real” fransuz qo‘l ostida 149 ta o‘yin o‘tkazib, 104 ta o‘yinda g‘alaba qozondi. 16 ta o‘yinda mag‘lubiyatga uchrab, 29 ta o‘yinda durang qayd etgan.