Peshku tumanidagi “Xurram” mahalla fuqarolar yig‘ini binosida o‘tgan ochiq sayyor sud majlisida endigina 18 yoshga to‘lgan S.O.ning jinoyat ishi ko‘rib chiqildi. Bu haqda yoshlar ittifoqi yurist-konsulti Murodjon Rahmatov “Daryo”ga ma’lum qildi.
Yoshlar ittifoqi Buxoro viloyat Kengashi tomonidan sud hukmi bilan bilib-bilmay qilgan xatosi uchun bir yilga ozodlikni cheklash jazosini olishi mumkin bo‘lgan o‘smir bolaning nega o‘g‘rilik sodir etgani sababi o‘rganildi. Aniqlanishicha, Peshku tuman Sanoat kasb-hunar kolleji o‘quvchisi S.O. oilaviy sharoitsizligi oqibatida yo‘ldan adashib, o‘g‘rilik sodir etgan. U oilada ikki farzandning biri. Onasi “Kalasang” qishlog‘idagi fermer xo‘jaligi ishchisi. Otasi Sodiq Odilov esa 12 yildan buyon xorijda ishlaydi, uzoq yillar davomida o‘z oilasidan xabar olmagan. Farzandlariga hech qanday moddiy ko‘mak yetkazmagan.
Oilada moddiy ta’minot yetishmovchiligi sabab, o‘smirda onasiga uy-ro‘zg‘or yukini tortishga ko‘maklashish istagi tug‘ilgan. U qishloqdagi do‘konlardan biridan 2 dona quyiltirilgan sut, 2 dona kilki konservasi, 1 dona pepsi ichimligi, 2 qadoq sosiska va 31 500 so‘m naqd pulni o‘g‘irlab, voqea joyidan yashiringan.
“Yoshlar o‘rtasida huquqbuzarliklar va jinoyatchilik profilaktikasini samarali tashkil etish, shu jumladan, ularning huquqiy madaniyatini oshirish va ma’naviy-axloqiy qadriyatlarni mustahkamlashga barchamiz shaxsan javobgarmiz. Holat sodir bo‘lgunga qadar hushyorroq bo‘lishimiz, oiladan tez-tez xabar olishimiz lozim edi”, — dedi “Xurram” mahalla fuqarolar yig‘ini raisi Botir Jumayev.
Mahalla fuqarolari, huquq-tartibot idoralari vakillari o‘smir bola va uning oilasiga yaqindan ko‘maklashish va kelajakda uning yana huquqbuzarlikka yo‘l qo‘ymasligi uchun nazoratga olishni bildirdi.
“O‘zbekiston Respublikasi Jinoyat Kodeksining 169-moddasi 2-qismi, “g” bandida ko‘rsatilgan jinoyatni sodir qilganlikda aybli, deb topilgan S.O. yoshlar ittifoqi viloyat Kengashi kafilligi ostida, shuningdek, jinoyat oqibatida yetkazilgan zararni bartaraf etganligi inobatga olinib, O‘zbekiston Respublikasi Jinoyat Kodeksining 71-modda, 3-qismi va Jinoyat-Preotsessual Kodeksining 463-moddasi 3-qismining 6-bandiga asosan, jazodan ozod qilindi”, — dedi Jinoyat ishlari bo‘yicha Peshku tuman sudi raisi Farrux Ikromov.
O‘zbekiston yoshlar ittifoqi Buxoro viloyati Kengashi kafilligi ostida S.O. sud zalidan jinoiy jazodan ozod qilindi. Onasi va yaqinlari bag‘riga qaytarildi.
Izoh (0)