9-mart kuni Andijon viloyati ichki ishlar boshqarmasi yo‘l harakati xavfsizligi boshqarmasi avtoturargohida avtomashinalar portlab ketishi sodir bo‘lganligi haqidagi ijtimoiy tarmoqlarda tarqalgan xabarlar yuzasidan viloyat IIB matbuot xizmati axborot berdi.
“Xavotirlanish uchun asos yo‘q. Hech qanday portlash sodir bo‘lmagan, aksincha, 9-mart kuni soat 16:30 larda Andijon shahri, Amir Temur shoh ko‘chasida joylashgan avtoturargoh hududida 5 tonnalik yoqilg‘i quyish tizimi atrofiga ehtiyotsizlik tufayli to‘kilgan 10 litr benzin yongan. Bu to‘g‘risida xabar berilgandan so‘ng yong‘in xavfsizligi xizmati xodimlari voqea joyiga o‘z vaqtida yetib borib, yong‘inni o‘chirishga muvaffaq bo‘lishgan. Hech kim talofat ko‘rmagan”, — deyiladi Andijon viloyati IIB xabarida.
Tezkor surishtiruv va o‘rganishlar natijasida yong‘in statik razryadlanish natijasida kelib chiqqani aniqlandi.
Eslatib o‘tamiz, 26-fevral kuni Andijon shahar ko‘p tarmoqli markaziy poliklinikasi hududidagi isitish qozonida portlash yuzaga kelishi oqibatida 18 o‘quvchi jarohatlangandi.
Izoh (0)