Iroqda IShIDga qurol-yarog‘ yetkazib beruvchi asosiy shaxslardan biri qo‘lga olindi

Iroq harbiy razvedkasi mamlakat shimolida IShID terrorchilik guruhiga qurol-yarog‘ yetkazib beruvchi asosiy shaxslardan biri qo‘lga olinganligini ma’lum qildi. Bu haqda harbiy razvedka boshqarmasi bayonotiga tayanib, “Korrespondent.net” xabar bermoqda.

“Maxsus operatsiya davomida Naynav viloyati tezkor qo‘mondonlik harbiy razvedka xizmati otryadlari xavfsizlik masalalarini nazorat qilgan IShID rahbariyati a’zolaridan birini qo‘lga oldi”, — deyiladi xabarda.

Boshqarmaning aniqlik kiritishicha, qo‘lga olingan IShID a’zosi Spayker aviabazasidagi qirg‘inda ishtirok etgan eng xavfli terrorchilardan biri hisoblanadi. U, shuningdek, IShIDni ta’minlab turgan asosiy qurol-yarog‘ savdogaridir.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.