Qirg‘iziston telekanallaridan birining jurnalisti Begimay Janibekova o‘zining Facebook’dagi sahifasida Saudiya Arabistonidagi Camel Fest etnofestivaliga kelgan vatandoshlarining madaniyatsiz xatti-harakatidan shikoyat qildi. Bu haqda “Tengrinews” xabar berdi.
Qiz ularning o‘zini tutishini jirkanch deb ta’riflagan va bir necha yigitlar stol atrofida deyarli erkin ko‘rinishda o‘tirgani tasvirlangan suratni ilova qilgan.
Uning aytishicha, yigitlar o‘zlarini juda madaniyatsiz tutib, festival tashkilotchilari tomonidan tashkillashtirilgan shved stolidagi ovqatlarga ochofatlarcha tashlangan, bir necha quti ichimliklarni o‘zlarining xonalariga olib chiqib ketgan va oqibatda boshqa odamlar deyarli och qolgan. Ayrimlari vaqtliroq kelgan va stol yozilmagan bo‘lsa baqirib, hushtak chalib tezroq bo‘lishlarini talab qilgan.
“Arablar bularning barchasini foto va videoga olishlarini hisobga olishlari kerak. Ular, ehtimol, qirg‘izlar o‘zini bunday tutishidan hayratda bo‘lsa kerak”, — degan u.
Begimay Janibekovaning chop etgan bu postdan keyin bosh rejissor Altinbek Maksutov Qirg‘iziston delegatsiyasi bilan tarbiyaviy va tushuntirish ishlari olib borgan.
Xabarda qayd etilishicha, 9—19-mart kunlari ar-Riyodda o‘tkaziladigan etnofestivalda minglab qirg‘izistonliklar ishtirok etadi. Respublika doirasida tanlab olingan ishtirokchilar qirg‘iz madaniyati, urf-odatlarini namoyish etadi, milliy sport va xalq og‘zaki ijodi haqida gapirib beradi va an’anaviy hunarmandchilikni namoyish etadi.
Bunda turar joy, oziq-ovqat, yuklar va hayvonlarni tashish va ishtirokchilarning festivalga tashrif buyurishi bilan bog‘liq barcha xarajatlar Saudiya Arabistonidan bo‘lgan tashkilotchilar tomonidan qoplangan.
Izoh (0)