Bosh prokuratura Surxondaryoda o‘ziga o‘t qo‘ygan fuqaro bo‘yicha qo‘shimcha ma’lumot berdi

B.E.ning o‘z joniga suiqasd qilish sababi o‘rganilganda, 2018-yil 5-dekabr kuni Termiz tuman hokimligi tomonidan tadbirkorlik qilib kelayotgan savdo shoxobchasini buzib tashlash talab etilganligi bois, hokimlik binosi oldida o‘z joniga suiqasd qilganligi vajini bayon qildi. Bu haqda “Daryo”ga Bosh prokuratura matbuot xizmati rahbari Surayyo Rahmonova ma’lum qildi.

Tuman hokimligida B.E.ning yer ajratish haqidagi murojaatlari mavjudligi fakti o‘rganilganda, u ushbu voqeaga qadar tuman hokimligiga yer ajratish haqida rasman murojaat qilmaganligi aniqlangan.

Aniqlanishicha, B.E. tadbirkor sifatida ro‘yxatdan o‘tmagan, biroq turmush o‘rtog‘i O.J. 2018-yilning 9-martida yakka tartibdagi tadbirkor sifatida ro‘yxatdan o‘tib, milliy shirinliklar, non-bulka va qandolatchilik mahsulotlari tayyorlash bilan shug‘ullanishga ruxsat beruvchi guvohnomaga ega bo‘lgan.

Biroq, O.J. tumandagi “Uchqizil” mahallasida 2018-yil boshlaridan 50 kv.m. yer maydonda o‘zboshimchalik bilan noqonuniy ravishda ayvon (naves) qurib olib, undan umumiy ovqatlanish shoxobchasi sifatida foydalanib, aholiga “pirojki” pishirib sotish bilan shug‘ullangan.

2018-yil noyabr oyida tuman hokimligining qurilish bo‘limi tomonidan B.E. yuqoridagi noqonuniy qurilishni buzib olish haqida og‘zaki ravishda ogohlantirilgan va u oila a’zolari bilan birga 2018-yil 4—5-dekabr kunlari noqonuniy qurilmani o‘z ixtiyori bilan buzib, buzishdan chiqqan qurilish materiallarini o‘zlari olib ketgan.

Vazirlar Mahkamasining 467-sonli qarorining 8-bandida vakolatli organ o‘zboshimchalik bilan qurilgan imorat aniqlangan taqdirda, ushbu imoratni qurgan shaxsni 15 kun muddatda ixtiyoriy buzib olish to‘g‘risida ogohlantirib, dalolatnoma rasmiylashtirish belgilangan.

Biroq, B.E. qonuniy qurilmani o‘z ixtiyori bilan buzib olganligi bois, hujjat rasmiylashtirilmagan.

Tekshirish davomida Termiz tuman hokimining 28.02.2019-yildagi 1074-sonli qaroriga asosan B.E.ga tumanning “Uchqizil” mahallasi hududidan vaqtincha foydalanish uchun yengil metall qurilmadan iborat 8,0×4,0 metr o‘lchamdagi 40,0 m.kv. yer maydonida ko‘chma “Savdo rasta”ni o‘rnatishga ruxsat berilishi ta’minlandi.

B.E. hozirda hech kimga da’vosi yo‘qligini, qilgan ishidan pushaymonligini ma’lum qilgan.

2019-yil 25-fevral kuni Termiz tumani, “Uchqizil” mahallasi at-Termiziy ko‘chasi markazida fuqaro B.E. o‘zi bilan olib yurgan 0,5 litr hajmdagi polietilen idishda bo‘lgan benzin yoqilg‘isini ustiga sepib, qo‘lida bo‘lgan zajigalka-yondirgich orqali o‘zini o‘zi yoqib yuborgani xabar berilgandi.

Natijada, B.E. kuyish tan jarohatlari bilan Termiz tuman tibbiyot birlashmasining jonlantirish bo‘limiga yotqizilgan. 2019-yil 25-fevraldagi ekspert xulosasiga ko‘ra, fuqaro B.E.da tananing 15% I-II darajali termik kuyishi natijasida, og‘irlik darajasiga ko‘ra “o‘rtacha” og‘irlikdagi tan jarohati aniqlangan.