Toshkentda tarkibida psixotrop moddalar bo‘lgan dori vositalarini bojxona chegaralari orqali noqonuniy ravishda olib o‘tishga uringan shaxslar qo‘lga olindi, deb xabar berdi DBQ matbuot xizmati.
“Toshkent-Aero” ixtisoslashtirilgan bojxona kompleksining Kontrabanda va bojxona qonunchiligi buzilishiga qarshi kurashish bo‘limi xodimlari tomonidan Toshkent aeroportida Dehlidan uchib kelgan fuqaro G.A. bojxona nazoratidan “yashil” yo‘lak orqali o‘tayotib, 100 dona “Klonazepam” tabletkalarini yashirin ravishda olib kirmoqchi bo‘lgan vaqtida to‘xtatib qolingan.
Shuningdek, uning yonida og‘zaki so‘rovda ma’lum qilinmagan 190 quti sifati kafolatlanmagan dori vositalari hamda 177 dona kosmetika va gigiyenik vositalar borligi aniqlangan.
Toshkent viloyati bojxona boshqarmasining “G‘ishtko‘prik” chegara-bojxona postida esa nafaqat psixotrop, balki narkotik moddalarni ham olib kirishga uringan qo‘shni davlat fuqarosi to‘xtatib qolingan.
Ushbu shaxsning o‘zi bilan olib kirayotgan dori vositalari orasida 149 dona “Tramadol” psixotrop tabletkalari bo‘lgan.
Shundan so‘ng ushbu shaxs xolislar ishtirokida ko‘zdan kechirilgan va ichki kiyimi orasiga 1 dona polietilen o‘ram yashirilganligi aniqlangan. O‘ramdagi 24 grammdan ortiq og‘irlikdagi modda esa ekspertlar xulosasiga ko‘ra, geroin giyohvandlik vositasi bo‘lib chiqqan.
Xabarda aytilishicha, hozirda ushbu holatlar yuzasidan bojxona tekshiruvlari davom ettirilmoqda.
Izoh (0)