Marg‘ilonda 11—13-iyul kunlari “Buyuk ipak yo‘li” xalqaro folklor musiqa festivali o‘tkaziladi

Birinchi “Buyuk ipak yo‘li” xalqaro folklor musiqa festivali joriy yilning 11—13-iyul kunlari Marg‘ilon shahrida o‘tkaziladi. Mazkur festivalga dunyoning 80 ga yaqin davlatidan sayyohlar kelishi kutilmoqda. Bu haqda “Daryo” muxbiri xabar bermoqda.

Vazirlar Mahkamasining 2018-yil 18-maydagi “Buyuk ipak yo‘li” xalqaro folklor musiqa festivalini tashkil etish va o‘tkazish to‘g‘risida”gi qarori asosida Marg‘ilon shahrida xalqaro festivalga tayyorgarlik ishlari boshlab yuborildi. Festival logotipini tayyorlash va tanlab olish bo‘yicha tanlov e’lon qilingan. Shaharda hunarmandlar markazi va hunarmandlar bozori qurilmoqda. Shuningdek, 36 ta hunarmandlar uyi va 2 ta karvonsaroy qurish rejalashtirilgan.

– May oyiga qadar folklor jamoalari o‘rtasida saralash bosqichlari bo‘lib o‘tadi. Shahrimizning “Chodirjamol” folklor jamoasi tomonidan ham tadbirga alohida tayyorgarlik ishlari olib borilyapti. Unutilib borayotgan eski laparlar, o‘lanlar festivalga mos ruhda qayta ishlanyapti. Qolaversa, anjumanda askiya san’ati namunalari ham ijro etiladi, – deydi Marg‘ilon shahar madaniyat bo‘limi boshlig‘i Mahmudjon Eminjanov.

“Buyuk ipak yo‘li” xalqaro folklor musiqa festivali har ikki yilda bir marta uch bosqichda o‘tkaziladi. Unda qo‘shiqchilik san’ati (alla, o‘lan, lapar, terma, marosim qo‘shiqlari, xalfachilik, baxshichilik va hokazo), raqs san’ati (turli hududlarga xos xalq raqslari), milliy qadim folklor cholg‘uchilik san’ati (milliy musiqa asboblarida asarlar ijrosi) kabi nominatsiyalar bo‘yicha tanlovlar o‘tkaziladi.

Festival doirasida ilmiy-ijodiy konferensiya va tanlov qatnashchilari ishtirokida gala konsert tashkil etiladi.

Festival g‘oliblari quyidagi pul mukofotlari bilan taqdirlanadi:1-o‘rin (har bir nominatsiya) — 3 500 AQSh dollari;2-o‘rin (har bir nominatsiya) — 2 500 AQSh dollari;3-o‘rin (har bir nominatsiya) — 1 500 AQSh dollari.