Popda UzFoton brendi ostida Xitoyning o‘rta sig‘imdagi yuk avtomobillari va mikroavtobusi ishlab chiqarilishi kutilmoqda. Bu haqda “Namanganskaya pravda” xabar berdi.
O‘zbekistonning “Foton Do‘stlik Servis” va Xitoyning Urumqi Xin Xi Xin Sheng International Trading kompaniyalari o‘rtasida qo‘shma korxona tuzilgan, xitoyliklar loyihaga 14 million dollar miqdorida sarmoya kiritmoqda. Yangi zavod aksiyalarining 51 foizi O‘zbekiston, 49 foizi Xitoyga tegishli.
“Foton Do‘stlik Servis” kompaniyasi rahbari Vohid Hamidovga ko‘ra, dastlabki reja bo‘yicha korxona 2018-yil sentabridan mahsulot chiqara boshlashi kerak edi, biroq bu obyektiv sabablar bilan joriy yil sentabriga qoldirilgan. Prezident qarori bilan loyiha 2019-yil investitsiya dasturiga kiritilgan.
Agar korxona ishga tushsa, bu yerda oyiga 500—1000 dona avtomobil yig‘iladi. Ikki tomon kelishuviga binoan, ular hozircha 4 turdagi o‘rtacha yuk avtomobili va Foton View CS2 Supporter mikroavtobusi bo‘ladi.
Izoh (0)