Namanganda xalq deputatlari viloyat kengashining navbatdagi o‘ttiz oltinchi sessiyasi bo‘lib o‘tdi. Bu haqda “Daryo”ga viloyat hokimligi matbuot xizmati ma’lum qildi.
Sessiyada Oliy Majlis Senatining mahalliy hokimiyat vakillik organlari faoliyatini kuchaytirishga ko‘maklashuvchi komissiyasi raisi Tolibjon Madumarov Senat Kengashining 2019-yil 15-fevraldagi “Fuqarolar yig‘inlari raislari (oqsoqollari) sayloviga tayyorgarlik ko‘rish va uni o‘tkazish to‘g‘risida” qarori ijrosi haqida ma’ruza qildi.
Fuqarolarning o‘zini o‘zi boshqarish organlari faoliyatini muvofiqlashtirish bo‘yicha viloyat kengashi raisining birinchi o‘rinbosari Musoxon Apaqov viloyatda saylovga tayyorgarlik doirasida amalga oshirilayotgan ishlar haqida axborot berdi.
Viloyat Kengashi deputatlari ushbu masala bo‘yicha tayyorlangan qaror loyihasini ko‘rib chiqib, ma’qulladi va fuqarolar yig‘inlari raislari (oqsoqollari) saylovini tashkil etish va o‘tkazishga ko‘maklashuvchi viloyat komissiyasi tarkibini tasdiqladi.
Viloyat kengashi sessiyasida 4-Umrzaqov saylov okrugidan saylangan deputat Olimjon To‘xtanazarov sud hukmiga binoan hamda 33-Isoqcho‘yan saylov okrugidan saylangan deputat Abdusalom Umarov vakolatini zimmasidan soqit qilishni so‘rab bergan arizasiga ko‘ra ularning deputatlik vakolatini muddatidan oldin to‘xtatish to‘g‘risida qaror qabul qilindi.
O‘rni bo‘shab qolgan ushbu okruglarda saylov o‘tkazish 2019-yil 24-mart kuniga belgilandi.
Eslatib o‘tamiz, xalq deputatlari Namangan viloyat kengashi deputati Olimjon To‘xtanazarov 2018-yil 22-sentabr kuni Chust tumanida arizachidan 500 AQSh dollarini olgan vaqtda ashyoviy dalil bilan ushlangan.
Jinoyat ishlari bo‘yicha Namangan tumani sudining 2019-yil 5-fevraldagi hukmi bilan O.To‘xtanazarovning qilmishi JK 168-moddasi 3-qismi “v” bandidan 168-moddasi 1-qismiga qayta malakalangan. Unga 3 yil muayyan huquqdan mahrum qilish, 2 yil 8 oy 31 kun ozodlikni cheklash jazosi tayinlangan.
Izoh (0)