Venesuela hukumati mamlakat xavfsizligi va suverenitetiga “jiddiy va noqonuniy tahdidlar” sabab Kolumbiya bilan chegara qisman yopilishini e’lon qildi, deya xabar bermoqda Meduza.
Bunda gap, Associated Press‘ning yozishicha, muxolifat AQSh yuborgan gumanitar yordam yuklarini Venesuelaga olib kirish uchun tanlagan hududlar haqida bormoqda. Venesuela Tashqi ishlar vazirligi gumanitar yordamni olib kirishga urinishni armiyada zo‘ravonlik va vahima keltirib chiqarishga qaratilgan “tomosha” deb atadi.
Juma kuni Kolumbiyaga o‘zini Venesuela prezidenti deb e’lon qilgan muxolifat yetakchisi Xuan Guaido tashrif buyurgan edi; u Venesuela harbiylarining yordami bilan Kolumbiyaga kelganini aytib o‘tgandi. U britaniyalik biznesmen Richard Brenson tomonidan uyushtirilgan xayriya konsertida qatnashgan.
Avvalroq gumanitar yordam yuklarini Venesuelaning Braziliya bilan chegarasi orqali olib o‘tishga urinishgan edi, biroq Venesuela hukumati chegarani yopib qo‘ygan. Oqibatda juma kuni chegara hududida Venesuela harbiylari va mahalliy aholi o‘rtasida to‘qnashuvlar yuz bergan, ikki kishi halok bo‘lgan.
Venesuelada bir necha yildan beri davom etayotgan og‘ir iqtisodiy inqiroz sabab odamlarga yegulik, dori va birinchi galda zarur mahsulotlar yetishmayapti. Venesuela prezidenti Nikolas Maduro esa uni noqonuniy hukmdor deb e’lon qilib, muxolifatni qo‘llab-quvvatlayotgan AQShdan gumanitar yordam qabul qilishdan bosh tortmoqda.
Izoh (0)