Toshkentda o‘zbek milliy taomlarini tayyorlash bo‘yicha mahorat darsi o‘tkaziladi

Bugun, 21-fevral kuni Buxoroda o‘z ishini boshlagan I Xalqaro ziyorat turizmi forumi dasturi nihoyatda rang-barang, deb yozadi “Xalq so‘zi”.

Forum kundaligiga ko‘ra, dastlabki kuni Buxoroning diqqatga sazovor joylari, tarixiy obidalari, muqaddas qadamjolari, xususan, yetti pir — Abduholiq G‘ijduvoniy, Muhammad Orif Revgariy, Mahmud Anjir Fag‘onaviy, Xoja Ali Romitaniy, Muhammad Boboyi Samosiy, Sayyid Amir Kulol va Bahouddin Naqshband me’moriy majmualari ziyorat qilinadi. Tadbirning ikkinchi kunida mehmonlar xalqaro forumda ishtirok etishi, B2B formatidagi muloqotlarga kirishishi mumkin.

Turizmni rivojlantirish davlat qo‘mitasining forumga mas’ul xodimi Sherzod Sultonovning aytishicha, forumning so‘nggi kuni, ya’ni 23-fevralda O‘zbekiston Oshpazlar uyushmasi mehmonlar sharafiga Toshkentda 10 Halal food mavzusida mahorat darsi o‘tkazadi. Unda 10 turdagi o‘zbek milliy taomi tayyorlanib, maxsus kechki ovqat dasturxoni yoziladi.

Aytish joizki, 2018-yildan boshlab O‘zbekistonning umumiy ovqatlanish shoxobchalari va restoranlarida “halol” standartini amaliyotga joriy etish bo‘yicha ishlar olib borilmoqda.