2018-yilning iyul oyida Jomboy tuman tibbiyot birlashmasiga qarashli laboratoriya bo‘limi laboranti vazifasida ishlab kelgan Azim Jalilov o‘zganing mulkini firibgarlik yo‘li bilan qo‘lga kiritish maqsadida, N.X.ni pul evaziga Jomboy tuman tibbiyot birlashmasi mansabdor shaxslari orqali ishga kiritib qo‘yishga ishontiradi. Azim Jalilov 2018-yilning 31-oktabr kuni N.X.ga ishga kiritish uchun tibbiyot birlashmasi mansabdor shaxslariga 300 dollar berish lozimligini aytadi.
2018-yilning 2-noyabr kuni soat 11:00 atrofida Jomboy tuman tibbiyot birlashmasiga qarashli ko‘p tarmoqli markaziy poliklinikasi laboratoriya bo‘limida Azim Jalilov 300 dollarni olgan vaqtida Bosh prokuratura huzuridagi Iqtisodiy jinoyatlarga qarshi kurashish Departamentining Samarqand viloyat boshqarmasi xodimlari tomonidan jinoyat ustida qo‘lga olingan.
“Daryo” muxbirining xabar berishicha, Jinoyat ishlari bo‘yicha Bulung‘ur tuman sudida bo‘lib o‘tgan sud majlisida sudlanuvchi Azim Jalilov sud muhokamasida o‘z aybiga to‘liq iqrorlik bildirgan. Uning ko‘rgazmasi sud muhokamasida so‘ralgan guvohlarning ko‘rgazmalari hamda jinoyat ishi hujjatlarida mavjud bo‘lgan inkor etib bo‘lmaydigan dalillar yig‘indisi bilan to‘liq o‘z isbotini topgan.
Sudya Farhod Xudayberdiyev raisligida o‘tgan sud mujlisida sudlanuvchi Azim Jalilov O‘zbekiston Respublikasi Jinoyat Kodeksining 168-moddasi (firibgarlik) 1-qismi hamda 211-moddasi 1-qismi bilan aybli deb topilib, unga nisbatan 2 yil muddatga ozodlikni cheklash hamda 1 yil muddatga muayyan huquqdan, ya’ni davlat ishtirokidagi tibbiyot muassasalarida moddiy va mansabdorlik lavozimlarida ishlash huquqidan mahrum etish jazosi tayinlandi.
Izoh (0)