Andijon viloyati Izboskan tumanidagi Manguberdi mahallasida yashovchi Madina Habibullayeva kungaboqarning yangi navini yaratdi, deb xabar beradi O‘zA.
“U hozir tumandagi 34-umumta’lim maktabining 10-sinfida a’lo baholarga o‘qish bilan birga, darsdan bo‘sh vaqtida moyli ekinlar seleksiyasi borasida ilmiy-tadqiqot ishlari olib bormoqda. Madinabonu ilmiy-tadqiqot ishlari natijalari, ijodkorligi bilan mamlakat va xalqaro miqyosdagi turli tanlov hamda ilmiy anjumanlarda faol ishtirok etib, qator yutuqlarni qo‘lga kiritdi”, — deyiladi xabarda.
Ta’kidlanishicha, ustozlari, mutaxassislar bilan hamkorlikda olib borilgan ishlar samarasida kungaboqarning “Madina 17”, “Madina” navlari yaratildi. Ushbu navlarga O‘zbekiston Respublikasi Intellektual mulk agentligi tomonidan tegishli tartibda patent olingan. O‘tgan yili kungaboqarning ushbu navlari O‘zbekistonning turli viloyatlarida ekilib, yuqori hosil olindi.
Qishloq xo‘jaligi fanlari doktori, professor Dilorom Yormatova bilan hamkorlikda soyaning yangi navlarini yaratish ustida ham izlanishlar olib bordi. Natijada soyaning ertapishar “Raduga”, kechpishar “Madina” navlari yaratildi. Mamlakatda asosiy va takroriy ekin sifatida ekishga mo‘ljallangan ushbu navlar 2018-yilda Davlat reyestriga kiritildi.
– Madina tirishqoq, izlanuvchan qiz, – deydi Toshkent davlat agrar universiteti Andijon filialining “Olima” uyushmasi raisi, qishloq xo‘jaligi fanlari doktori Mahfuza Yusupova. – Darsdan bo‘shadi deguncha tajriba-tadqiqot dalasiga oshiqadi. Bilim va tajribasini oshirish uchun o‘qib-o‘rganishdan charchamaydi. Qizimizning kelajagi porloq, ilm-fan rivoji yo‘lida hali ko‘p ishlar qiladi, deb ishonamiz.
Madinaning ilmiy-tadqiqot ishlari “O‘zbekiston ayollarining 100 ta eng yaxshi innovatsion loyihasi” tanlovi viloyat bosqichida yuqori baholanib, g‘oliblar qatoridan joy oldi. U o‘z ishlari bilan mazkur tanlovning mamlakat bosqichida ham ishtirok etmoqda.
Toshkent davlat agrar universiteti professori, seleksioner olima Go‘zal Xolmurodova rahbarligida Asaka tumanidagi “Asaka oil plant seeds” urug‘chilik fermer xo‘jaligi tajriba dalasida soyaning oddiy va murakkab duragaylarini yaratish bo‘yicha olib borilayotgan ilmiy- tadqiqot ishlarida ham ishtirok etmoqda. Hozirda olingan duragay urug‘larning doni yirikligi, moy va proteinga boyligi ko‘rsatkichlari bo‘yicha tadqiqot olib bormoqda.
Bundan tashqari, Madina she’rlar mashq qiladi, maqolalar yozib turadi. Ijod namunalari qator matbuot nashrlarida e’lon qilingan. Hozirga qadar uning “Vaqt qadri”, “Iqror” nomli to‘plamlari nashr etilgan.
– Men ozod va obod yurtning baxtiyor yoshlaridan biriman, – deydi Madina Habibullayeva. – Chunki men va men kabi yoshlarga puxta bilim olishimiz, iste’dod va salohiyatimizni yuzaga chiqarish uchun barcha sharoit yaratilgan. Kelajakda mehnatim, ilm-fan yo‘lidagi izlanishlarim bilan Vatanimiz ravnaqi uchun xizmat qiladigan inson bo‘lishga va’da beraman.
Izoh (0)