Navoiy viloyati ichki ishlar boshqarmasi tizimida harbiy o‘quv mashg‘ulotlari haftaligi o‘tkazilmoqda. Jangovar mashg‘ulotlar viloyatning shimoliy hududlarida tashkil etilayapti. Bu haqda Navoiy viloyati IIB matbuot xizmati xabar berdi.
O‘quv mashg‘ulotlari viloyat markazidan 200 km uzoqlikda joylashgan Zarafshon shahrida olib borilib, jarayon shaxsiy tarkibning yig‘in xabari asosida yetib kelishi, ularning zaruriy anjomlar bilan ta’minlanganligini ko‘zdan kechirish bilan boshlandi.
“Mashg‘ulotlarimizning asosiy qismi qurilishi tugallanmagan binoda o‘tkazildi. Bunda qurollangan jinoyatchilarning 2 nafar fuqaroni garovga olish sahnasini uyushtirdik. Mashg‘ulotda qatnashayotgan xizmatchilarimiz vaziyatni oldindan bilmagani bois, navbatchilik qismiga kelib tushgan murojaatdan so‘ng qutqaruv jarayonlarida o‘zlarining haqiqiy salohiyatini ko‘rsatishdi”, — deydi Navoiy viloyati IIB matbuot xizmati rahbari O‘ktam Usmonov.
O‘quv mashg‘ulotlari Uchquduq tumanida ham tashkil etildi. Mashg‘ulotlar yakunida ichki ishlar organlari shaxsiy tarkibining jangovar va kasbiy tayyorgarligiga baho berilib, harakatlar davomida yo‘l qo‘yilgan kamchiliklar yuzasidan topshiriqlar belgilab berildi.
Dildora Kattayeva
Izoh (0)