Qurolli Kuchlar Markaziy ashula va raqs ansambli Orol dengizini qutqarish maqsadida ter to‘kayotgan mehnatkashlar uchun Qoraqalpog‘iston Respublikasining Mo‘ynoq tumanida konsert dasturi tashkillashtirdi. Bu haqda Mudofaa vazirligi matbuot xizmati “Daryo”ga ma’lum qildi.
Ushbu konsert Shimoli-g‘arbiy harbiy okrugi targ‘ibot va tashviqot guruhi tashabbusi bilan Mo‘ynoq tumani markazidan 115 kilometr uzoqlikda joylashgan hududda ishchilarning dam olishlarini maroqli o‘tkazishi va hordiq chiqarishi maqsadida o‘tkazildi.
Ta’kidlash kerakki, O‘zbekiston Prezidentining tashabbusi bilan qabul qilingan 2017—2021-yillarda Orolbo‘yi mintaqasini rivojlantirish Davlat dasturi doirasida Orolbo‘yida ijtimoiy-iqtisodiy holatni, aholi turmush sharoitini yaxshilash, ekologik falokat asoratlarini yumshatish bo‘yicha investitsiya loyihalari amalga oshirilmoqda.
Shuningdek, bu kabi konsert dasturlari harbiy san’atkorlar tomonidan Qo‘ng‘irot tumanida joylashgan maktablarda ham tashkil etildi.
Xorazm viloyati Gurlan tumanida esa Afg‘onistonda bo‘lib o‘tgan janglarda ishtirok etgan o‘g‘lonlarning olib chiqilgan kunini nishonlashga bag‘ishlangan bayram tadbiri o‘tkazildi. Sobiq ittifoq askarlarining qo‘shni respublikadan olib chiqilganiga 30 yil to‘lishi munosabati bilan o‘tkazilgan tadbirda tuman hokimligi, mudofaa ishlar bo‘limi, sud, prokuratura organi xodimlari hamda 255 nafar afg‘on urushi qatnashchilari ishtirok etdi.
Tadbir davomida afg‘on urushi qatnashchilari o‘z xotiralari bilan bo‘lishdi. Ularning yigitlik burchini bajarishdagi jasoratlari e’tirof etildi.
Izoh (0)