“Xalq so‘zi Online” qabristonlarni tartibga keltirish maqsadida Guliston shahridagi “Qaropchi” qabristonida bo‘lgan tadbir haqida maqola chop etdi. Quyida maqola to‘lig‘icha havola etildi.
Xalqimiz “Har bir kishi yetti otasining ismini bilishi kerak” deydi. Bu naql zamirida katta ma’no bor va unda eng avvalo ota-bobolarimiz xotirasiga hurmat- ehtirom mujassam. Ammo oramizda, yetti ota-onasining nomi u yoqda tursin,mozor shayxlaridan “Men falonchining o‘g‘liman, otamning qabrini topolmayapman”, deb yordam so‘raydiganlar ham uchraydi. Bundan ma’lumki, ular yaqinlari dafn etilgan qabristonga 10—20 yil kelmagan, mangu qo‘nimgoh esa o‘sha vaqtdagidek emas, ancha kengayib ketgan...
Guliston shahridagi “Qaropchi” qabristonida bo‘lgan tadbirda ana shu afsuslanarli hayotiy misol asnosida qabristonlarni obod qilish, tartibga keltirish, farzandlarimiz ongiga qabrlarni ziyorat qilish xayrli ish ekanligini singdirish, bir so‘z bilan aytganda, mazkur manzillarda ham insonlar yotganligini esdan chiqarmaslik xususida gap bordi.
Marosimda viloyatdagi barcha qabristonlarni tartibga keltirish, ko‘kalamzorlashtirish, obodonlashtirish bo‘yicha zarur tavsiyalar berildi. Xususan, barcha mozorlarni o‘zbekona somon suvoq bilan qoplashga kelishib olindi. Va bu ishlar xalqimizga ming yillardan buyon tantana ulashib kelayotgan Navro‘z ayyomigacha yakunlanib, sharqona Yangi yil arafasida o‘tganlarning ruhi ham shod qilinadigan bo‘ldi.
Tadbirda Sirdaryo viloyati hokimi G‘. Mirzayev, O‘zbekiston musulmonlari idorasi masjidlar bo‘limi mudiri M. Qayumov ishtirok etdilar va so‘zga chiqdilar.
Izoh (0)