Avvalroq O‘zA saytida O‘zbekiston bozorlaridagi oziq-ovqat, nooziq ovqat va qishloq xo‘jaligi mahsulotlarining 17 fevral holatidagi narxlari to‘g‘risida ma’lumot berilgandi.
Unda Farg‘ona shahar Markaziy dehqon bozorida mol go‘shti narxi 36-40 ming so‘m, qo‘y go‘shti 34-40 ming, tovuq go‘shti 18-20 ming so‘mdan sotilayotganligi ko‘rsatib o‘tilgan. Farg‘ona shahar hokimligi bunga o‘z munosabatini bildirgan, deb yozadi UZ24.
Shahar hokimi H.Habibiddinov ushbu maqoladagi ko‘rsatib o‘tilgan holatlar shahar hokimligi tomonidan o‘rganib chiqilgani va ma’lumotlar o‘z tasdig‘ini topmaganini ma’lum qilgan.
Farg‘ona shahar hududidagi dehqon bozorlarda narx-navolarning barqarorligini saqlash aholini arzon va sifatli oziq-ovqat va qishloq xo‘jaligi mahsulotlari bilan ishonchli ta’minlash, asosiy turdagi qishloq xo‘jaligi mahsulotlari narxlarining barqaror saqlanishini, narxlarning asossiz oshib ketishining oldini olish, sanitariya holatini yaxshilash, aniqlangan kamchiliklarni bartaraf etish maqsadida “Shahar maxsus shtabi” tuzilgan bo‘lib, muntazam faoliyat olib bormoqda.
Qayd etilishicha, bugungi kunda bozorlarda asosiy turdagi qishloq xo‘jalik mahsulotlari – mol go‘shti 30-36 ming so‘m, qo‘y go‘shti 34-40 ming so‘m, tovuq go‘shti 14-17 ming so‘m, tuxum 400-550 so‘m, kartoshka 1500-2000 so‘m, piyoz 600-1000 so‘m, sabzi 1200-1500 so‘m va mevalar 1000-10000 so‘mdan sotilishi ta’minlanmoqda.
Izoh (0)