Fransiyadagi shaharda itlarga vovullash taqiqlandi. Taqiqni buzganlik uchun jarima belgilandi

Fransiya shimolidagi Fyokyer shahri meri mahalliy itlarga baland ovozda vovullashni taqiqladi. Bu haqda “Liga Novosti” xabar berdi.

Bu taqiq shahar kengashi tomonidan ma’qullangan bo‘lib, yangi qoidani buzgan itlarning egalari 68 yevro miqdorida jarima to‘lashlariga to‘g‘ri keladi.

Fyokyer meri ayrim kuchuklar kun davomida vovullab, aholining tinch hayotiga xalal bergani uchun shunday taqiq qo‘yish zarurligini ta’kidlagan.

Hayvon huquqlarini himoya qiluvchilar bundan noroziligini bildirgan. Mer esa itlarga qarshi hech qanday adovati yo‘qligini, ularning har bir vovullashi uchun egalarini jarimaga tortmasligini ta’kidlagan. Faqatgina qo‘shnilar bundan shikoyat qilsagina jarima belgilanishini aytgan.

Hammasi Fyokyerda yashovchi ayolning uyidagi bir necha itlarning doimiy vovullashidan norozi bo‘lgan aholining shahar rasmiylariga chora ko‘rishni so‘rab petitsiya imzolaganidan boshlangan. Mer shahar kengashidagi hamkasblari bilan birga ayol bilan bir necha marta gaplashib olishga uringan, ammo buning iloji bo‘lmagan.

Hayvon huquqlarini himoya qiluvchilar xuddi shunday bahona bilan cherkov qo‘ng‘iroqlarining chalinishiga taqiq o‘rnatish mumkinligini, itlarga jag‘, jumladan, vovullash uchun ato etilganini aytib, shahar rasmiylarini sudga bermoqchi.