“Daryo” kolumnisti yangi ruknda o‘tgan haftada muhokama qilingan asosiy ijtimoiy masalalarga to‘xtalib o‘tadi.
Eksport ko‘lamini kengaytiraylik
Hozir kim ko‘p — tashvishidan noligan ko‘p. Judayam kuyinchak odamman — hammaning dardiga yechim topgim keladi. O‘tgan hafta obunachi yig‘olmay kasod bo‘lgan gazetalar haqida yozdim. Ha, yil boshida obuna-yu, yil oxirida dehqonlar hosilini sotish muammosiga nondek o‘rganib qoldik. Men bugun ushbu muammoning yechimini beraman.
Gazeta bilan poshshoniyam, pashshaniyam o‘ldirsa bo‘ladi, ammo mayda amaldorning yo‘talidan ham hurkadigan gazeta bilan pashsha o‘ldirgan ma’qul. Bundan tashqari, gazetaga tansiq mevalar o‘rash mumkin. Gap shundaki, Rossiya va uning sharqidagi davlatlarda bizning mevalarni ishtaha bilan yeyishadi. Serquyosh yurt mevasining tabiiy mazasi sharqiy yevropaliklarni mazaxo‘rak qilgan. Meva eksportchilarimiz xabar beradiki, u yevropalik xaridorlar o‘zbek mevasini o‘zbekcha gazetalarga o‘ralganligidan ajratib oladi. Qarangki, uchar sotuvchilar boshqa mamlakatlardan keladigan bemaza mevalarni ham o‘zbekcha gazetaga o‘rab qo‘ysa, xaridorlar talab ketayotibdi. Biz iqtisodda bozor munosabatlariga asoslangan pragmatik yo‘lni tanlaganmiz. Taklifim shundan iboratki, o‘tmayotgan gazetalar chop etilishi bilanoq qutilarga taxlanib, chet eldagi meva-sabzavotchi biznesmenlarga eksport qilinishi zarur. Taka bo‘lsa-da sut bersin.
Ko‘p yillik va oz yillik daraxtlar
Gavjum joyga daraxt ekdingiz. Ko‘p yillik daraxt. Uzoq-uzoqlarga ildiz otdi. Bir tomiri supermarketning tagida bo‘lsa, boshqasi bankning ostiga kirib ketgan. Vaqti kelib, daraxtni ag‘darishdan qiyin ish bo‘lmaydi, ishonavering. Uyoqqa ag‘darsangiz, katta bir inshootni qulatsa, buyoqqa ag‘darsangiz, bir to‘da odamni bosib qoladi. Yagona yo‘li — shoxlari va yuzadagi tomirlarini bitta-bittadan kesib, oxirida o‘zining ostiga arra solish. Darvoqe, shoxlarini kesib bo‘lgach, o‘zini manzarali daraxt sifatida ko‘z-ko‘z qilish uchun qo‘qqaytirib qo‘ysangiz ham bo‘ladi. O‘tgan-ketganlar tomosha qiladi, daraxt bormi — bor.
Optimist bo‘lamiz, optimist. Qanchadan qancha tayinlovlar, vazifa almashtirishlar kechyapti. Kecha katta bir tashkilot rahbarligiga Eshmatjon Toshmatov tayinlansa, ko‘z yumib-ochguncha vazifasidan ozod etilib, Toshmatjon Eshmatov qo‘yilyapti. Eslab qolishga ham ulgurmaysan kishi. Haftaning eng muhim xabari kecha ma’lum qilindi. Ammo optimizm yaxshi-da. Ko‘p yillik daraxtni ko‘chirish osonmas. Ozroq tursayam manzara va hosilini ko‘raylik.
Aytgancha, dono xalqimizning nozik idora ahlini “quda taraf” deb lutf qilishining lavhamizga aslo aloqasi yo‘q.
Joriy yilda Toshkentda uchar avtomobillar qatnovi yo‘lga qo‘yiladi
O‘tgan hafta “O‘zavtosanoat” raisi o‘rinbosarining Jizzaxda Peugeot Citroën zavodining tomi, devori, poli borligi haqidagi bayonotini tabassum bilan o‘qidim. Ha, do‘stlar, tomi, devori va poli bor degani zavod ham deyarli tayyor degani. Yana qanday zavod — qo‘shma zavod. Bitta taqaning yoniga yana uchta qo‘shilib, usti butlansa, ot naqd.
Ma’lumot uchun: Jizzaxdagi Peugeot Citroën zavodi rejaga ko‘ra 2019-yildan boshlab 160 mingtadan mashina ishlab chiqarishi kerak edi. Aslini olganda, umidimizni puchga chiqargan Peugeot Citroën zavodi qurilishigina emas.
Loukoster tashkil etilishi ishlari 2018-yilda yakunlanishi kerak edi. Ammo arzon aviakompaniya haqidagi orzular orzuligicha turibdi. Toshkentda yo‘l haqi to‘lovini avtomatlashtirish haqida naq to‘qqiz yil oldin va’da berilgan bo‘lsa (unda “Daryo” sayti hali tashkil etilmagani bois havola keltirmadik) haligacha “kutish rejimi”da. To‘g‘ri, insof yuzasida 2017-yilda yana ikki-uch marta va’da berildi.
Muhtaram mutasaddilar. Joriy yilda uchar avtomobillar qatnovi yo‘lga qo‘yilishi va Toshkent metropoliteniga Hyperloop poyezdi keltirilishi haqida bayonot berishingiz mumkin. Biz barchasiga ishonamiz.
Sarvar usta
Muallif fikri tahririyat nuqtai nazariga mos kelmasligi mumkin.
Avvalgi hafta ijtimoiy muammolari:
Izoh (0)