MIB toshkentlik haydovchilardan 9 kunda 5,5 milliarddan ortiq summani undirdi

Huquqbuzarliklar uchun o‘z vaqtida haydovchilarning e’tiborsizligi oqibatida to‘lanmagan jarimalar endi MIB tomonidan majburiy undiriladi. Majburiy ijro byurosining Toshkent shahar boshqarmasi va Toshkent shahar IIBB YHXB bilan hamkorlikda MIB ish yurituvidagi ijro hujjatlari qarzdorliklari undiruvi bo‘yicha qo‘shma reyd-tadbir o‘tkazdi, deb yozadi O‘zA.

Shu yilning 30-yanvaridan boshlangan tadbirning 9 kunida jami bo‘lib undirilgan jarimalar miqdori 5 milliard 603 million 065 ming 115 so‘mni tashkil etmoqda. Bu bilan jami bo‘lib 18 700 nafar qoidabuzar aniqlangan.

Toshkent shahar haydovchilarining boshqa viloyatlarda sodir etgan huquqbuzarliklari bo‘yicha 9 513 nafar yoki 2 milliard 754 million 047 ming 219 so‘m jarimalar undirildi. Byuroning Toshkent shahar ish yurituvidagi ijro hujjatlari bo‘yicha poytaxtning 20 ta markaziy ko‘chasida YHXBning patrul xizmat avtomobillarida o‘rnatilgan avtomatik moslama yordamida 9 kunda 7 367 ta qoidabuzardan 2 milliard 508 million 940 ming 726 so‘m jarimalar undirilgan. Olib borilgan tadbirlar natijasida esa 949 million 239 ming 593 so‘m jarimalar undirilgan. Bu bilan 3 342 ta qoidabuzar aniqlangan.

Shuningdek, 53 ta avtotransport vositasi jarima maydonchalariga joylashtirildi. Shundan Byuroning Toshkent shahar boshqarmasi tomonidan qidiruvda bo‘lgan 14 ta avtotransport vositasi ham aniqlandi.