Emiliano Sala halok bo‘lgani rasman tasdiqlandi

Argentinalik hujumchi Emiliano Sala La-Mansh bo‘g‘ozi ustidan uchayotgan samolyotning aviahalokati sabab vafot etgani tasdiqlandi. Bu haqda Dorset grafligi politsiyasi xabar berdi.

Ta’kidlanishicha, samolyot bo‘laklari orasidan 28 yoshli futbolchining tanasi topilgan va suvdan chiqarilgan.

Bu haqda halokatga uchragan Sala va uchuvchi Devid Aybbotson (uning tanasi hali topilganicha yo‘q)ning qarindoshlariga ma’lum qilindi. Ular bilan maxsus mutaxassislar ishlamoqda.

Salaning o‘limi yuzasidan ish olib borgan Koroner xizmati aviahalohat sabablari va futbolchining vafoti belgilarini o‘rganmoqda.

Eslatib o‘tamiz, Sala 19-yanvar kuni “Nant” klubidan “Kardiff”ga taxminan 20 million yevro evaziga o‘tgandi. Bu Uels klubi tarixida rekord transfer bo‘ldi.

Yangi klub bilan shartnoma tuzgan argentinalik “Nant” klubidagi sobiq jamoadoshlari va yaqinlari bilan xayrlashish maqsadida bitta motorli PA 46 Malibu samolyotida Fransiyaga qaytdi.

21-yanvar kuni xuddi shu samolyotda Kardiffga uchgandi. Dushanba kuni mahalliy vaqt bilan taxminan soat 20:00 da samolyot bilan aloqa uzildi. Samolyot aviadispetcher radarida ko‘rinish bermadi. Shundan so‘ng Gernsi orollaridagi La-Mansh bo‘g‘oziga tezkor qidiruv bo‘limi yuborildi.

22-yanvar kuni politsiya Sala uchgan taxminan 1700 kvadrat mill bo‘lgan hududda qidiruv-qutqaruv operatsiyasini boshladi va 24-yanvar kuni samolyotni qidirish ishlari to‘xtatilgandi.

Salaning qarindoshlari yo‘qolgan futbolchini qidirish maqsadida pul to‘plashga kirishdi. Ikki kun ichida muxlislar va mashhur futbolchilar 300 ming yevrodan ko‘p mablag‘ yig‘di va 3-fevral, yakshanba kuni Salani qidirish operatsiyasi boshlandi.

Dastlab qutqaruvchilar Sala uchgan samolyotni topdi, keyin esa samolyot bo‘laklari orasidan uning tanasini.

Emiliano Sala faoliyati davomida “Bordo”, “Orlean”, “Nyor”, “Kan” va “Nant” klublarida o‘ynadi. “Kardiff”da to‘p surish esa unga nasib etmadi.