Turg‘unboyev ishi yopildi. Kimga aza, kimga to‘y?

O‘zbekiston futbol assotsiatsiyasi 5-fevral kuni bir vaqtda ikkita klub bilan shartnoma tuzishda gumon qilingan Aziz Turg‘unboyev masalasini ko‘rib chiqib, ishga yakun yasadi.

Futbol mutaxassisi Alisher Nikimbayev Telegram’dagi kanalida mazkur voqeaga quyidagicha munosabat bildirdi.

Shunday qilib Turg‘unboyev ishi ko‘rib chiqildi, qaror qabul qilindi.

Natija esa quyidagicha:

1. Futbolchi diskvalifikatsiya qilindi;
2. Ikkala jamoa bilan tuzilgan shartnomasi bekor qilindi;
3. Ikkala klubning ishchilar jamoasi hamda “Navbahor”ning sobiq bosh murabbiyi Ilhom Mo‘minjonov diskvalifikatsiya qilindi.

Qarorning asoslash tafsilotlariga to‘xtalmasdan turib, mazkur vaziyatdan so‘ng kim yutdi, qaysi biri esa yutqazdi, degan savollarni berib ko‘ramiz:

G‘oliblar.

1. “Navbahor”. Namangan klubi o‘tgan yili o‘z o‘yinchisi uchun kurashda yaqqol mag‘lub bo‘ldi, ammo “Paxtakor” bilan muzokaralar olib borish o‘rniga (O‘FA matbuot xizmatining xabar berishicha, 3-dekabr kuni “Navbahor” tomonidan o‘ziga bosim bo‘layotgani haqida futbolchi murojaat qilgan), boshqa usullarni qo‘llagan, natijada esa o‘yinchi ikki o‘t orasida qolgan. Oxir-oqibat “Paxtakor” bilan tuzilgan shartnoma bekor qilingan. Endi, ehtimol, diskvalifikatsiya muddati tugagandan so‘ng “Navbahor” Turg‘unboyevga yangi shartnoma taklif qiladi. “Paxtakor”ga esa hech qanday tovon puli to‘lanmaydi.

2. Turg‘unboyev. Ha, u diskvalifikatsiya qilindi. Biroq ikki klub bilan shartnoma tuzganligi sababli jazodan qutulib qolmasligi aniq edi. Ammo 9-iyul kuni uning diskvalifikatsiya muddati tugaydi (agar O‘FA saytiga rostan ham ishonadigan bo‘lsak). Qaror qabul qilingan kundan boshlab hisoblansa, 6 oydan kamroq vaqtni tashkil etadi. Bundan tashqari Turg‘unboyevning o‘tkazgan so‘nggi rasmiy uchrashuvidan hisoblaydigan bo‘lsak (21-yanvar kuni Osiyo Kubogida Avstraliyaga qarshi kechgan bahs), shunda ham 6 oyga yetib bormaydi. Osiyo Kubogi so‘nggi uchrashuvidan so‘ng, Qrimda bo‘lib o‘tgan yig‘inda “Navbahor” tarkibida ishtirok etdi va “Paxtakor” bilan tuzgan shartnoma qoidalarini buzdi. Bir so‘z bilan aytganda, Turg‘unboyevning omadi chopdi, chunki u e’lon qilinganidan ko‘ra kamroq diskvalifikatsiya oldi.

Yutqazganlar.

1. “Paxtakor”. Toshkent klubi O‘FA va OFKdan ro‘yxatdan o‘tgan, u bilan shartnoma imzolagan futbolchini yo‘qotdi. Bundan tashqari shartnoma endilikda haqiqiy emas, futbolchi kompensatsiyasiz boshqa klubga o‘tishi mumkin.

Shu o‘rinda bitta narsaga e’tiborni qaratish lozim:

Turg‘unboyev 2018-yilning 3-dekabr kuni “Paxtakor”da o‘ynashni istayotgani, biroq uning bu qaroriga “Navbahor” tomonidan bosim bo‘layotgani haqida o‘z qo‘li bilan ariza yozib ketgan (har holda O‘FA saytida shunday yozilgan). Ammo so‘nggi ikki oy davomida bosim pasaymagan, natijada futbolchi shartnoma shartlarini buzishga majbur bo‘ldi. Endi O‘FAning futbolchilarni himoya qila olish haqidagi murojaatiga kim ishonadi? Turg‘unboyev murojaat qildi, hammasi qanday yakun topdi?