Tashqi ishlar vaziri Magnitogorskda qahramonlik ko‘rsatgan o‘zbek yigitiga sovg‘a topshirdi

5-fevral kuni O‘zbekistonning Yekaterinburg shahridagi Bosh konsulxonasida Olamafruz Abdullayev bilan uchrashuv bo‘lib o‘tdi. Bu haqda TIB matbuot xizmati xabar berdi.

Unda Rossiyada vaqtinchalik bo‘lib turgan hamyurtlar, jumladan, oliy ta’lim muassasalari talabalari, shuningdek, Sverdlovsk viloyatidagi o‘zbek diasporasi rahbari Zokir Allabergenov ham taklif etilgan.

Uchrashuv yakunida Olamafruz Abdullayevga O‘zbekiston Respublikasi Tashqi ishlar vaziri nomidan qimmatbaho sovg‘a va mamlakatning Yekaterinburg shahridagi Bosh konsulxonasi faxriy yorlig‘i topshirildi. “O‘zbekiston havo yo‘llari” milliy aviakompaniyasi tomonidan uning 7-fevralda uchib ketishi uchun Yekaterinburg—Toshkent reysiga bepul bilet ajratilgan.

Eslatib o‘tamiz, o‘tgan yilning 31-dekabr kuni Magnitogorsk shahrining Karl Marks ko‘chasida maishiy gaz portlashi oqibatida o‘n qavatli uyning podyezdlaridan biri qulab tushishi oqibatida 39 kishi halok bo‘lgan edi.

O‘zbekiston fuqarosi Olamafruz Abdullayev  birinchilardan bo‘lib yordamga shoshilgan va qutqaruvchilar kelgunga qadar o‘z hayotini xavf ostiga qo‘yib bino qoldiqlari orasidan sakkiz kishini qutqargan.