Xitoy chivinlarga qarshi kurashishning yangi usulini joriy etdi, deb yozadi TravelAsk.
Buning uchun Xitoy chivinlar urchitiluvchi maxsus zavodni ishga tushirdi. Yevropa chivinlarga qarshi bir necha o‘n yillardan buyon muntazam ravishda kurashib kelayotgan bo‘lsa, Janubi-sharqiy Osiyoda bu muammoga nisbatan yaqinda e’tibor qaratildi.
Gap shundaki, Yevropada muammoni hal qilish uchun issiq mavsum boshlanishidan oldin suv havzalarini infeksiyaga qarshi vositalar bilan ishlov berishning o‘zi yetarli. Tropik Osiyoda esa yil davomidagi issiq va nam iqlim sharoiti tufayli chivinlarga qarshi choralar uzoq davom etuvchi, qimmat va deyarli samarasiz kurashga aylanadi.
Bu hasharotlar juda ko‘p muammolar keltirib chiqaradi. Estetik noqulaylik va qichishishdan tashqari, ular har yili minglab odamlar o‘limiga sabab bo‘luvchi bir qator xavfli kasalliklar tashuvchisi hisoblanadi.
Hasharotlarning salbiy ta’siri qatoriga xorijiy sayyohlik hisobiga kun ko‘ruvchi ko‘pgina tropik mamlakatlar uchun hududning rekreatsion jozibadorligini kamaytirishini keltirish mumkin. Bu esa jiddiy iqtisodiy muammoga aylanadi.
Shu sababli chivinlarga qarshi kurashish maqsadida Xitoy olimlari Guanchjouda noodatiy chivinlar urchitiluvchi maxsus zavodni ishga tushirdi. Unda barcha urchitilgan erkak chivinlar bitta foydali bakteriya bilan zararlantirilgan. Zavodda har oyda minglab hasharotlar paydo bo‘ladi.
Ushbu hasharotlar boshqa yovvoyi chivin bilan chatishganda bakteriya bilan zararlab, uni bepusht qilib qo‘yadi. Laboratoriya sharoitida o‘tkazilgan tadqiqotlar bu usulning yuqori samaradorli ekanini ko‘rsatgan. Tajribaviy populyatsiya esa 90 foizga qisqargan.
Bunday tajribadan tashqari, olimlar chivinlardan kasallikka qarshi turishga yordam beruvchi antitela olishni rejalashtirmoqda.
Izoh (0)