Pentagon IShID bir yil ichida Suriyadagi hududlarini qaytarib olishga qodirligini tan oldi

IShID harbiy bosim bo‘lmagan taqdirda Suriyadagi hududlarini bir yilga yetmagan vaqt ichida qaytarib olishi mumkin. Bu haqda Pentagon hisobotiga tayanib, NBC News telekanali ma’lum qildi, deya xabar beradi “Interfaks”.

Pentagon bosh inspektorining Suriyadagi operatsiya yuzasidan choraklik hisoboti loyihasi bilan tanish mansabdorlarga ko‘ra, IShID unga harbiy bosim o‘tkazilmagan taqdirda hududlarini 6 —12 oyda qaytarib olishi mumkin. Hisobot kelgusi haftada e’lon qilinishi kutilmoqda.

Hisobotda Suriya hukumati terrorchi guruh davlat infrastrukturasiga tahdid qilmasa IShIDni ta’qib etishiga shubha bildirilgan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.