Namanganda erini o‘ldirib kanalga oqizgan ayol va uning o‘ynashi qidirilmoqda. Bu haqda Bosh prokuratura “Daryo”ga ma’lum qildi.
Mazkur holat yuzasidan o‘tkazilgan tergovga qadar tekshirish davomida quyidagilar aniqlandi.
Ma’lum qilinishicha, Dilshod (ismi o‘zgartirilgan) turmush o‘rtog‘i 1989-yilda tug‘ilgan Nigora (ismi o‘zgartirilgan) bilan yaqin qarindoshi – amakisining o‘g‘li, 1992-yilda tug‘ilgan Davron (ismi o‘zgartirilgan) bilan o‘zaro ishqiy munosabatda bo‘lib kelganligidan shubha qilib, 18-yanvar kuni spirtli ichimlik ichib, turmush o‘rtog‘i Nigora bilan uyida o‘zaro janjallashgan.
Bundan xabar topgan Davron telefon orqali Dilshodni o‘zini xonadoniga chaqirib, xolasining o‘g‘li Tohir (ismi o‘zgartirilgan)ga temir boltani berib, Dilshod kelib, janjal qilishi bilan uning bosh qismiga bolta bilan qasddan urishi haqida ko‘rsatma bergan.
18-yanvar kuni soat 21:30 larda Dilshod amakisi Xolmat (ismi o‘zgartirilgan)ning uyiga kelib, turmush o‘rtog‘i Nigora va Davron o‘rtasidagi ishqiy munosabatlarni Xolmat bilan muhokama qilayotgan vaqtida Davron ham janjalga aralashgan paytda, Tohir uning orqasidan kelib, qo‘lidagi temir bolta bilan Dilshodning boshiga bir marta urgan. Dilshod muvozanatini yo‘qotgandan so‘ng Xolmat boltani olib, Dilshodning boshiga bolta bilan 2 marta urgan. Dilshod yerga yiqilgandan so‘ng, Davron kelib, Dilshodni bosh qismiga qasddan tepgan. Oqibatda Dilshod voqea joyida vafot etgan.
Shundan so‘ng, Davron va Tohir jinoyat izlarini yashirish maqsadida Dilshodni jasadini ko‘rpaga va polietilen selofanga o‘rab, Davronning otasi Xolmatga tegishli Lacetti’ning yukxonasiga solib, Namangan shahar, Mashad MFY hududidan oqib o‘tgan “Shimoliy Farg‘ona” kanaliga tashlab yuborishgan.
Jinoyatni sodir etilishida foydalanilgan temir boltani Chortoq tumani, Gulshan MFY hududidan oqib o‘tgan “Chortoq soy” arig‘i qirg‘og‘iga tashlab yuborishgan.
Mazkur holat yuzasidan 26-yanvar tuman prokuraturasi tomonidan Davron, Xolmat va Tohirlarga nisbatan JKning 97-moddasi 2-qismi “p” bandi bilan jinoyat ishi qo‘zg‘atilgan.
Marhum Dilshodning jasadi 27-yanvar kuni To‘raqo‘rg‘on tumani, Uzumzor MFY hududidan oqib o‘tgan “Shimoliy Farg‘ona kanali”dan ko‘rpa va polietilen selofanga o‘ralgan holatda tan jarohatlari bilan topilgan.
Yuqoridagilarga ko‘ra, Xolmat va Tohirlar JKning 97-moddasi 2-kismi “p” bandida nazarda tutilgan jinoyatni sodir etganlikda gumon qilinuvchi tariqasida ishga jalb qilinib, JPKning 221-moddasi tartibida ushlangan, 28-yanvar Xolmat, Timurlarga JKning 97-moddasi 2-kismi “p” bandi bilan jinoyat ishida ayblanuvchi tariqasida ishtirok etishga jalb etilib, qamoqqa olish tarzidagi ehtiyot chorasi qo‘llanildi.
Davron tergovdan yashirinib Qozog‘istonga marhum Dilshodning turmush o‘rtog‘i Nigora bilan birgalikda qochib ketganligi sababli 28-yanvar unga nisbatan JKning 97-moddasi 2-qismi “p” bandi bilan sirtdan ayblanuvchi tariqasida ishtirok etishga jalb qilish haqida qaror qabul qilinib, qamoqqa olish tarzidagi ehtiyot chorasini qo‘llanildi va qidiruv e’lon qilindi.
Hozirda jinoyat ishi viloyat prokuraturasi o‘ta og‘ir jinoyatlarni tergov qilish bo‘limi ish yurituviga olindi. Jinoyat ishi bo‘yicha tergov Bosh prokuratura nazoratiga olindi.
Izoh (0)