Osiyo Kubogi—2019. Qatar BAAni tor-mor qilib finalga chiqdi (video)
29-yanvar, seshanba kuni futbol bo‘yicha Osiyo Kubogi—2019 musobaqasining 1/2 final bahslari doirasida ikkinchi uchrashuv nihoyasiga yetdi.
Unda Qatar terma jamoasi musobaqa mezboni BAA termasiga qarshi maydonga tushdi va yirik 4:0 hisobida g‘alaba qozondi.
1-bo‘limning 22-daqiqasida Bualem Hukhi hisobni ochgan bo‘lsa, 36-daqiqaga kelib Almuaz Ali hisobni 2:0 ko‘rinishiga olib keldi.
O‘yinning asosiy vaqti tugashiga 9 daqiqa qolganda Hassan Al-Haydos jamoasining 3-golini kiritib, hisobni yiriklashtirdi. Uchala golga ham Akrom Afif assistentlik qildi. O‘yinning 90+3-daqiqasida Hamid Ismoil Karim Boudiaf uzatgan to‘pni darvozaga joylab qo‘ydi va bahsga yakun yasadi.
Shu tariqa Qatar terma jamoasi BAA darvozasiga javobsiz 4 ta gol urdi va musobaqaning finaliga yo‘llanmani qo‘lga kiritdi. Endi qatarliklar finalda Yaponiya bilan musobaqa chempionligi uchun kurash olib boradi.
Eslatib o‘tamiz, Yaponiya Eron termasi darvozasiga javobsiz 3 ta to‘p kiritib, musobaqaning finaliga yo‘l olgandi.
Osiyo Kubogi—2019
1/2 final bahslari
29-yanvar, seshanba
Qatar—BAA 4:0
Gollar: 1:0 — 22 Hukhi, 2:0 — 36 Almuaz Ali, 3:0 — 81 Al-Haydos, 4:0 — 90 Hamid Ismoil.Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
